İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 142 Hüküm no: 110 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mustafa b. Hüseyin’in vârislerinin, diyet davasında Seyyid Hasan ile sulh olduğu Diyetden 1.200 guruşa sulh Ma‘rûz[-ı dâ‘î-i devlet-i aliyyeleridir ki] Anadolu’da Zeyveli aşîretinden olup bin iki yüz on bir senesi Ramazani’l-mübârekinin beşinci Cuma günü vakt-i duhâda İskilib kazâsına tâbi‘ Alagöz karyesi toprağında ırmak kenarında mecrûhan vefât eden es-Seyyid Mustafa b. es-Seyyid Hüseyin’ın verâseti babası merkūm es-Seyyid Hüseyin ile vâlidesi Huri Hatun’a münhasıra ba‘dehû merkūmân es-Seyyid Hüseyin ve Huri Hatun müte‘âkiben vefât etmeleriyle verâsetleri sulbî kebîr oğulları es-Seyyid İbrahim nâm kimesneye ba‘de’l-inhisâr merkūm es-Seyyid İbrahim meclis-i şer‘-i münîrde Cihânbeyli aşîretinden bâ‘isü’l-i‘lâm es-Seyyid Hasan b. Mehmed muvâcehesinde Cihânbeyli aşîreti ümerasından es-Seyyid Mustafa Bey ve Konevî Mustafa ve Hacı Daloğlu Ahmed ve Zeyveli el-Hâc Hasan ve Osman Ağa ve İskilibî el-Hâc Abdurrahman hâzır olduğu hâlde merkūm es-Seyyid Hasan târih-i mezkûrda yedinde olan barut ve kurşun memlû Bahçesaray şeşhânesini bi-gayr-ı hakkın amden karındaşım müteveffâ-i merkūmun üzerine sıkıp sâlifü’l-beyân şeşhânenin kurşunu müteveffâ-i mezbûrun göğsüne isâbet ve arkasından hurûc edüp iki tarafdan cerh ettikden sonra yirmi dört sa‘at mürûrunda darb ve cerh-i mezkûrun tesîrinden nâşî merkūm es-Seyyid Mustafa vefât edüp ve merkūm es-Seyyid Hasan ebeveynim müteveffiyân-ı merkūmâna ve bana müddet-i sefer-i ba‘îd mahallerde geşt ü güzâr eylediğinden başka ba‘zı evkātda aşîreti ümerasından mütegalibe gürûhuna ilticâ ile iki def‘a kendisinden da‘vâ olunmuş ise de ihkāk-ı hak mümkün olmamağla el-hâletü hâzihî husûs-ı mezkûrun mûceb-ı şer‘îsini merkūm es-Seyyid Hasan’ın külliyen inkârına mukārin da‘vâya tasaddî eylediğimde beynimizde ba‘de’l-münâza‘a bâ-tavassut-ı muslihîn beynimiz ıslâh olunup ben ber-vech-i muharrer tasaddî eylediğim da‘vâ-yı mezkûremden merkūm es-Seyyid Hasan ile kat‘an li’n-nizâ‘ ve ref‘an li’l-husûme bin iki yüz guruş bedel-i makbûz üzerine sulh olunup mûrisim müteveffâ-i evvel-i merkūmun dem ü diyetine ve bi’l-cümle husûs-ı mezkûra müte‘allika âmme-i de‘âvî ve kâffe-i mutâlebâtdan merkūm es-Seyyid Hasan’ın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt edüp bu vechile külliyen kat‘-ı nizâ‘ eyledim dediğini merkūm es-Seyyid Hasan tasdîk eylediği İstanbul Mahkemesi’nden huzûr [-ı âlîlerine i‘lâm olundu.] Fî 18 M sene [12]37