İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 143 Hüküm no: 111 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uşak kasabası ahi babalığı şeyhliğine, Seyyid Hacı Mehmed’in tayin edildiği Uşak kasabasında şeyhliği ve ahi babalığı ilmühaber istid‘âsı sahtiyâncı esnâfınındır Ma‘rûz Sâdır olan fermân-ı âlîlerine imtisâlen işbu arzuhâl ve hâmişinde mastûr ve derkenâra nazar olundukta Uşak kasabasında vâki‘ sahtiyâncı esnâfının şeyhlik ve ahîbabalığı sene-i sâbıkā Rebî‘ülâhiri ile müverrah olup dîvân-ı hümâyûndan i‘tâ buyrulan fermân-ı âlîşân mûcebince mahalli sâkinlerinden es-Seyyid el-Hâc Mehmed’in uhdesinde olduğu ve merkūm es-Seyyid el-Hâc Mehmed sadâkat ve istikāmetle zikr olunan şeyhlik ve ahîbabalığı idâre ve rü’yet edüp bi’l-cümle beldesi sekenesi kendisinden hoşnûd ve râzı olduklarına binâen sâlifü’l-beyân şeyhlik ve ahîbabalığı ba‘zı ağrâzın müdâhalesinden tahlîs içün bâ-sened mutasarrıf olduğu yevmî on beş akçesi hazîne-mânde olunarak şeyhlik ve ahîbabalık-ı mezkûr meblağ-ı merkūm mukābelesinde ber-vech-i te’bîd kendüye tevcîh ve başmuhâsebe kaleminden yedine berât-ı âlîşân ihsân buyrulması niyâzında olduğu arzuhâl ve derkenârdan ve merkūm es-Seyyid el-Hâc Mehmed mütedeyyin ve mücerrebü’l-etvâr olmağla bi’l-cümle Uşak kasabası ahâlîsi ve esnâfı kendisinden müteşekkir olmalarıyla merkūmun merâmına müsâ‘ade nizâm-ı esnâfı dahi halelden vikāye olduğu hâlâ Uşak kasabası Kādısı Hâfız Mustafa Efendi dâ‘îlerinin mührü mutâbık i‘lâmından ve i‘lâm-ı mezkûra merbût ahâlî mahzarından müstebân olup ve fi’l-hakīka merkūm es-Seyyid el-Hâc Mehmed hüsn-i hâl ile mevsûf olmağla şâyân-ı âtıfet idüğünü Der-aliyye’de bâ-berât-ı âlîşân dikicibaşı olan Süleyman Ağa ve tâcirler kethüdâsı İsmail Ağa ve yiğitbaşı es-Seyyid Ahmed Ağa ve es-Seyyid Mehmed Himmet Ağa ve Başyiğit Ahmed Ağa ve es-Seyyid Ömer Usta ve sahtiyâncı esnâfından el-Hâc Ramazan Ağa ve es-Seyyid Mustafa Ağa ve es-Seyyid Ali Ağa ve el-Hâc Mehmed Ağa ve sâir mazbûtü’l-esâmî kimesneler ihbâr etmeleriyle bu makūle esnâf kethüdâ ve şeyhliği merkūm es-Seyyid el-Hâc Mehmed’in istid‘âsı vechile akçe-i hazîne mândesi mukābelesinde ber-vech-i te’b‘îd tevcîh ve başmuhâsebe kaleminden berât i‘tâsı mesbûk ise sâlifü’z-zikr şeyhlik ve ahîbabalık sâhib-i arzuhâl-i merkūm es-Seyyid el-Hâc Mehmed üzerinde fermân-ı âlîşân ile olup zâhir-i hâlde âharın müdâhalesi iktizâ etmemekle mutasarrıf olduğu yevmî on beş akçesi hazîne mânde olarak sâlifü’l-beyân ve ahîbabalık ve şeyhlik kendi hâlinde ırzıyla mukayyed olup bir ferdi rencîde etmemek şartıyla merkūm es-Seyyid el-Hâc Mehmed’e kemâ-fi’s-sâbık tevcîh ve yedine başmuhâsebe kaleminden müceddeden berât-ı âlîşân sadaka ve ihsân ve dîvân-ı hümâyûn kalemine ilmühaber i‘tâsı muktezâ-yı maslahat idüğü imtisâlen li’l-emri’l-âlî İstanbul Mahkemesi’nden huzûr [-ı âlîlerine i‘lâm olundu.] Fî 17 M sene 1237