İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 144 Hüküm no: 112 Orijinal metin no: [24a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Begos v. Kirkor’un, Corci v. Corci aleyhine açtığı alacak davasında iddiasını ispat edemediğinden mu‘ârazadan men edildiği Uncu değirmeni Ma‘rûz[-ı dâ‘î-i devlet-i aliyyeleridir ki] Uncu tâifesinden arzuhâl eden Begos v. Kirkor zimmî meclis-i şer‘-i münîrde mahrûse-i Galata hâricinde Beyoğlu nâm mahalde vâki‘ bir bâb fırancılacı fırını gediğinin mâliki arzuhâlde mastûrü’l-ism Corci v. Corci zimmî tarafından husûs-ı âtîde vekîl-i sâbitü’l-vekâlesi Artin v. Kegork zimmî muvâcehesinde vekîl-i mersûmun yedinde olup ibrâz eylediği sene-i sâbıkā Şa‘bânının on beşinci günü ile müverrah ve İstanbul Bâb Mahkemesinde mukayyed bir kıt‘a i‘lâm-ı şer‘î mantûkunca benim ve şerîkim gāib ani’l-meclis Zakar zimmînin müvekkil-i mersûmun fırın-ı mezkûrda müstecir olan gāib ani’l-beled Pandalı zimmî zimmetinde dakīk semeninden iştirâken hakkımız olan sekiz bin beş yüz on guruşa müvekkil-i mersûm Corci zimmî kefîl olmayup lâkin mersûm Pandelı zimmî meblağ-ı mezbûru bize kable’l-edâ firâr ve gaybet ettikden habbâzân [24b] esnâfının şürût-ı nizâmları üzere ben ve şerîkim mersûmdan her birimiz gāib-i mesfûr Pandelı zimmî zimmetinde alacağımız olan meblağ-ı mezkûr sekiz bin beş yüz on guruşu âlât-ı gedik-i mezkûrun mâliki müvekkil-i mersûm Corci zimmîden mutâlebe eylediğimizde ol dahi rızâsıyla meblağ-ı mezbûrun iki bin yüz elli guruşunu mâlından vekîl-i mersûm Artin zimmî yediyle teberru‘an bize def‘ ve teslîm biz dahi ahz ü kabz ve istihlâk edüp mâ‘adâsı olan altı bin üç yüz altmış guruş mutâlebesine ve târih-i i‘lâm-ı mezkûra gelince sâir cemî‘ hukūk-ı şer‘iyyeye müte‘allika âmme-i da‘vâdan müvekkil-i mersûm Corci zimmî ile medyûn-ı gāib-i mersûm Pandelı zimmîden her birinin zimmetini kabûlü hâvî ibrâ ve iskāt etmişdik lâkin müvekkil-i mersûm Corci zimmî kable’l-ibrâ bana sen şimdilik şerîkinle sana teberru‘ eylediğim iki bin yüz elli guruşu ahz edin ba‘dehû bâkīsinden senin hisseni ceste ceste tamamen vereyim deyü bana va‘ad eylediğine binâen ibrâ-i mezkûrum muvâza‘aten olmuş olup ve ben ba‘dehû ibrâ-i mezkûruma nâdim olmamla meblağ-ı bâkī-i mezbûrdan hissemi ta‘ahhüdü üzere ceste ceste bana teslîme müvekkil-i mersûm Corci zimmîye izâfetle işbu vekîl-i mersûm Artin zimmîye cebr olunması murâdımdır deyü tasaddî eylediği da‘vâsı sahîha ve meşrû‘a ve iltifâta şâyân olmamağla kelâmına iltifât olunmayup da‘vâ-yı mezkûresiyle müvekkil-i mersûm Corci zimmîye bî-vech mu‘ârazadan men‘ olunduğu İstanbul Mahkemesi’nden huzûr [-ı âlîlerine i‘lâm olundu.] Fî 14 M sene 1237