İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 145 Hüküm no: 113 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hüseyin b. Mehmed Emin için babası üzerine nafaka takdiri Nafaka-yı sagīr Ma‘rûz[-ı dâ‘î-i devlet-i aliyyeleridir ki] Fi’l-asl mahrûse-i Edirne ahâlîsinden olup İstanbul’da Karabaş Mahallesi’nde sâkine derûn-ı arzuhâlde mezkûretü’l-ism zâtı mu‘arrefe Şerîfe Emine Hatun bt. Mustafa meclis-i şer‘-i münîrde Terkoz kazâsına tâbi‘ İkitelli karyeli zevc-i mutallıkı sâhib-i arzuhâl Mehmed Emin Ağa b. Ahmed muvâcehesinde mezbûr Mehmed Emin zevc-i dâhilim olup işbu târih-i i‘lâm günü beni tatlîk etmekle mezbûrun zimmetinde mütekarrir ve ma‘kūdun aleyh olan elli bir guruş mehr-i müeccel hakkım ile nafaka-i iddetim içün bi’t-terâzî ta‘yîn olunan on sekiz guruş ki cem‘an altmış dokuz guruşu merkūm Mehmed Emin Ağa işbu meclis-i şer‘de bana def‘ ve teslîm ben dahi yedinden tamamen ve kâmilen ahz ü kabz edüp ancak hukūk-ı zevciyete müte‘allika da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ba‘de’l-ibrâ ve’l-kabûl mezbûrun firâşından hâsıl ve benden mütevellid ve hâlâ bi-hakki’l-hıdâne hacrimde olan sulbî sagīr oğlu hâzır bi’l-meclis es-Seyyid Hüseyin’in mâlı olmayup nafakaya muhtâc olmağla sagīr-i mezbûrun nafakası içün babası merkūm üzerine kadr-i ma‘rûf meblağ farz ve takdîr olunmak bi’l-hıdâne murâdımdır dedikde gıbbe’t-tasdîki’ş-şer‘î sagīr-i mezbûrun nafaka ve kisve ve sâir levâzım-ı zarûriyyesi içün kıbel-i şer‘den babası merkūm Mehmed Emin Ağa üzerine işbu târih-i i‘lâmdan beher şehr yirmi dört guruş nafaka ve kisve-bahâ farz ve takdîr olunup meblağ-ı mefrûz-ı mezkûru sagīr-i mezbûrun nafakasına harc ve sarfa ve lede’l-hâce istidâneye ve inde’z-zafer babası merkūm üzerine rücû‘a vâlidesi mezbûre Şerîfe Emine Hatun’a izin verildiği İstanbul Mahkemesi’nden huzûr [-ı âlîlerine i‘lâm olundu.] Fî 16 M sene 1237