İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 146 Hüküm no: 114 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agob v. Kirih’in un değirmeni gediğini, ortağı Seyyid İsmail Ağa’ya sattığı Kasımpaşa’da uncu değirmeni Kaydı ihrâc şüd fî-28 Cumâdelûlâ sene [1]301 Ma‘rûz[-ı dâ‘î-i devlet-i aliyyeleridir ki] Uncu esnâfından Agob v. Kirih nâm zimmî meclis-i şer‘-i münîrde habbâzân kethüdâsı Mehmed Ağa ve uncular kethüdâsı diğer Mehmed Ağa ve uncular kethüdâsı sâbık İbrahim Ağa ve Çetecizâde İbrahim Ağa ve Uncu Osman Ağa ve yiğitbaşıları İbrahim Ağa ve sâir nizâm ustaları hâzır oldukları hâlde bâ‘isü’l-i‘lâm Uncu es-Seyyid İsmail Ağa b. es-Seyyid Mehmed Emin nâm kimesne mahzarında takrîr-i kelâm edüp mahrûse-i Galata’ya muzâfe kasaba-i Kasımpaşa’da Zindân ardında kâin ma‘lûmü’l-hudûd iki horoslu bir bâb uncu değirmen derûnunda mevcûde beyne’l-esnâf gedik tâ‘bir olunur sekiz re’s bârgir ve onda isâbet eden sâir âlât-ı lâzıme-i ma‘lûmeden mâlik olduğum beşer re’s bârgir [ve] on altı mıh hisse-i şâyi‘amın bir re’s bârgir [ve] on altı mıh hisse-i şâyi‘asını yedimde mukaddemâ ibkā ve dört re’s bârgir ve onlara isâbet eden âlât-ı lâzımesini bin iki yüz otuz dört senesi Şa‘bâni’l-mu‘azzamının on üçüncü günü İstanbul [kādısı] sâbık Semahatlü Atûfetlü Mehmed Hâmid Efendi hazretlerinin huzûrlarında mezbûr es-Seyyid İsmail Ağa’ya dört bin iki yüz elli guruş semen-i medfû‘ ve makbûza bey‘ ve li-ebeveyn kız karındaşım Oskohi Nasrâniye dahi mâlike olduğu iki re’s bârgir ve sekiz mıh hisse-i şâyi‘asını otuz dört senesi Şa‘bâni’l-mu‘azzamının yirmi ikinci günü yine efendi-i mûmâ-ileyhin huzûrunda iki bin dört yüz seksen guruşa mezbûr es-Seyyid İsmail Ağa’ya kezâlik bey‘ ve bâlâda mezkûr yedimde ibkā eylediğim bir re’s bârgir ve on altı mıh hisse-i şâyi‘amı dahi bu def‘a tarafeynden bi’l-îcâb ve’l-kabûl bâtten ve sahîhan bi-safkatin vâhidetin müşterikim mezbûr es-Seyyid İsmail Ağa’ya iki bin beş yüz guruşa bey‘ ve temlîk ve teslîm eylediğimde ol dahi ber-vech-i muharrer yedimden iştirâ ve temellük ve tesellüm ve kabz ve kabûl edüp semen-i mezkûr iki bin beş yüz guruşun bin beş yüz yirmi dokuz guruşunu benim cânib-i mîrîye olan deynime mahsûben kabzına me’mûra vermek üzere müşteri-i merkūma emr eylediğimde ol dahi emrim üzere teslîme ta‘ahhüd edüp bâkīsi olan dokuz yüz yetmiş bir guruşu dahi bana def‘ ve teslîm ben dahi yedinden tamamen ve kâmilen ahz ü kabz etmemle mebî‘-i mezkûrun tağrîr ve gabnine müte‘allika âmme-i da‘vâda tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt etmemizle fîmâ ba‘d sâlifü’l-beyân bir re’s bârgir ve on altı mıh hisse-i şâyi‘a ve mukaddemâ şirâen mâlik olduğu altı re’s bârgir ve sekiz mıh hisse-i şâyi‘a ki cem‘an sekiz re’s bârgir ve iki horos ve onlara isâbet eden sâir âlât-ı lâzıme-i ma‘lûmede benim aslâ ve kat‘â alâka ve medhalim kalmayup mezbûr es-Seyyid İsmail Ağa’nın mâlıdır dediğini mezbûr es-Seyyid İsmail Ağa ba‘de’t-tasdîk [25a] mezbûr es-Seyyid İsmail Ağa’nın âlât-ı gedik-i mezkûrun kaleminde mâlik-ı sâbıkları üzerlerinde olan kaydları ref‘ ve terkīn-birle mezbûr es-Seyyid İsmail Ağa’nın ismi tasrîhiyle kalemine müceddeden kayd ve yedine sûret i‘tâ buyrulması niyâzında olup ve fi’l-hakīka esnâf-ı merkūmenin bu makūle kalemde mukayyed gedik âlâtının mâlik-ı sâbıkları üzerlerinde olan kaydları ref‘ ve terkīn-birle hâlâ mâliki ismine kaydolunmak şürût-ı nizâmlarından olduğunu habbâzân kethüdâsı ve uncular kethüdâsı ve sâir nizâm ustaları ihbâr dahi etmeleriyle bu sûretde âlât-ı mezkûrun mecmû‘u mezbûr es-Seyyid İsmail Ağa’nın istid‘âsı vech üzere şürût-ı nizâmlarına tatbîkan mezbûr es-Seyyid İsmail Ağa ismine kayd ve yedine müceddeden sûret i‘tâsı iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 14 M sene 1237