İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 149 Hüküm no: 116 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola, Kosta ve İstefan’ın müştereken mâlik oldukları değirmen gediğini Mehmed Sâdık Ağa’ya sattıkları Değirmen mübâya‘ası Ma‘rûz[-ı dâ‘î-i devlet-i aliyyeleridir ki] Medîne-i Üsküdar’a muzâfe Yoros nâhiyesine tâbi‘ Anadolu Kavağında vâki‘ dört horoslu bir bâb habbâz değirmeninden iki horos sekiz re’s bârgir hissesine mâlik olan Nikola v. Markarit ve bir horos dört re’s bârgir hissesine mâlik olan Kosta v. Atam ve bir horos dört re’s bârgir hissesine mâlik olan İstefan v. Atam zimmîler taraflarından husûs-ı âtîde vekâleti habbâzân esnâfından İdris Beşe b. Ahmed ve Eyüb Usta b. Mehmed şehâdetleriyle zâhir olan hâlâ habbâzân kethüdâsı Mehmed Ağa b. Ali meclis-i şer‘-i münîrde uncular kethüdâsı diğer Mehmed Ağa ve esnâfından İbrahim Ağa ve Çetecizâde İbrahim Ağa ve Osman Ağa ve Mustafa Ağa ve diğer İbrahim Ağa ve sâir nizâm ustaları hâzır oldukları hâlde bâ‘isü’l-i‘lâm Mehmed Sâdık Ağa b. Mehmed mahzarında bi’l-vekâle takrîr-i kelâm edüp müvekkillerim mersûmûnun akd-i âti’z-zikrin sudûruna değin yedlerinde mülkleri olan bâlâda mezkûr habbâz değirmeninden dört horos ve on altı re’s bârgir ve onlara isâbet [eden] sâir âlât-ı lâzıme-i ma‘lûmelerini tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile mezbûr Mehmed Sâdık Ağa’ya otuz üç bin beş yüz dört guruşa bi’l-vekâle bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl ve semen-i mezkûr otuz üç bin beş yüz dört guruşun yirmi altı bin yedi yüz elli guruşunu müvekkillerim mersûmûn cânib-i mîrîye olan yirmi altı bin yedi yüz elli [guruş] deynleri beher sene hitâmında biner guruş vermekle kabzına memûra edâya ve beş bin doksan sekiz guruşunu ol mikdâr medyûnu Bayram Ağa’ya ve dört yüz elli altı guruşunu ol mikdâr medyûnu el-Hâc Veli Ağa’ya ve dört yüz guruşunu ol mikdâr medyûnu Penbecizâde Mehmed Ağa’ya ve sekiz yüz guruşunu ol mikdâr medyûnu el-Hâc Musa Ağa’[ya] edâ ve teslîm etmek üzere müşteri-i mezbûr Mehmed Sâdık Ağa’[ya] emr eylediğimde ol dahi emrim üzere edâ ve teslîme ta‘ahhüd ettikden sonra mebî‘-i mezkûrun tağrîr ve gabnine müte‘allika âmme-i de‘âvî ve mutâlebât ve kâffe-i eymân ve muhâsamâtdan her birimiz âharın zimmetini asâleten ve vekâleten kabûlü hâvî ibrâ etmemizle fîmâ ba‘d zikr olunan değirmende olan dört horos ve on altı re’s bârgir ve onlara isâbet eden [25b] sâir âlât-ı lâzıme-i ma‘lûmelerde müvekkillerim mersûmûnun aslâ ve kat‘â alâka ve medhalleri kalmayup mezbûr Mehmed Sâdık Ağa’nın mülk-i müşterâsı olmuşdur dediğini merkūm Mehmed Sâdık Ağa bi’l-muvâcehe ba‘de’t-tasdîk mezbûr Mehmed Sâdık Ağa’nın âlât-ı gedik-i mezkûrun kaleminden mâlik-i sâbıkları üzerlerinde olan kaydları ref‘ ve terkīn-birle mezbûr Mehmed Sâdık Ağa’nın ismi tasrîhiyle kalemine [kayd] ve mücedden yedine sûret i‘tâ buyrulması niyâzında olup ve fi’l-hakīka esnâf-ı merkūmenin bu makūle kaleminde gedik âlâtının mâlik-i sâbıkları üzerlerinde olan kaydları ref‘ ve terkīn-birle hâlâ mâliki ismine kaydolunmak şürût-ı nizâmlarından olduğunu uncular kethüdâsı ve esnâfından sâir nizâm ustaları ihbâr dahi etmeleriyle bu sûretle âlât-ı gedik-i mezkûrun mecmû‘u mezbûr Mehmed Sâdık Ağa’nın istid‘âsı vech üzere şürût-ı nizâmlarına tatbîkan mezbûr Mehmed Sâdık Ağa ismine kayd ve yedine müceddeden sûret i‘tâsı iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 14 M sene 1237