İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 156 Hüküm no: 123 Orijinal metin no: [26a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Keko’nun, Lanka Yenikapı’daki kasap dükkânı gediğini İbrahim Ağa ve Lütfullah Efendi’ye sattığı Kasab gediği Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm-ı mağfiret-nişan Sultan Abdülhamid Hân hazretlerinin evkāf-ı hümâyûnlarından İstanbul’da Yedikule hâricinde vâki‘ gayr-ez selhhâne-i mîrî on aded ganem selhhâne-i evvele merbût kasab dükkânlarından İstanbul’da Lanka Yenikapısı dâhilinde bir tarafdan sığır kasabı ve bir tarafdan sebzeci dükkânları beynlerinde kâin bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin rub‘una bâ-temessük-ı mütevellî mutasarrıf olan Nikola v. Keko zimmînin oğlu ve tarafından husûs-ı âtîde vekîl olduğu Kiko v. Keko ve Eftem v. Dimitri zimmîler şehâdetleriyle sâbit olan Kiko zimmî meclis-i şer‘-i münîrde hâlâ hâssa kasabbaşısı hâcegân-ı dîvân-ı hümâyûndan es-Seyyid Ali Efendi taraflarından mürsel kasablar kethüdâsı el-Hâc Hasan Ağa b. el-Hâc Osman ve sâir kasab ustaları hâzır oldukları hâlde kasab ustalarından bâ‘isü’l-i‘lâm el-Hâc İbrahim Ağa b. Mustafa ve şerîki Lütfullah Efendi b. el-Hâc Ömer mahzarlarında bi’l-vekâle takrîr-i kelâm edüp zikr olunan kasab dükkânı derûnunda mevcûde âlât-ı lâzıme-i mezkûreden müvekkilim mersûmun mutasarrıf olduğu rub‘ hissesini bedel-i ma‘lûm ve makbûz mukābili ferağ-ı kat‘î-i mu‘teber ile bâ-re’y-i mütevellî şerîkân-ı mezbûrân el-Hâc İbrahim Ağa ve Lütfullah Efendi’ye iştirâken bi’l-vekâle ferağ ve tefvîz eylediğimde onlar dahi tefevvüz ve kabûl ve hisse tevzî‘ini ustalar ma‘rifetleriyle tamamen ahz etmek üzere ta‘ahhüd edüp fîmâ ba‘d kasab gediği tâ‘bir olunan âlât-ı muharrere-i mezkûrenin rub‘ hissesinde müvekkilim mersûmun alâka ve medhali kalmayup şerîkân-ı merkūmânın hakk-ı müfavvazları olmuşdur dediğini şerîkân-ı merkūmân ba‘de’t-tasdîk rub‘ hisse-i mezkûre müvvekkilim mersûmun ferağından kendi üzerlerine iştirâken tahrîr ve defter-i vakfa kayd ve yedlerine taraf-ı vakıfdan temessük i‘tâ buyrulmasını istid‘â-yı inâyet eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 25 M sene 1237