İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 181 Hüküm no: 154 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İplikçi Kosti v. Hristo’nun, esnafa borcunu ödemesi karşılığında rehin aldığı evi Tavid v. Manok’a iade etmesi gerektiği Menzil mübâya‘ası Ma‘rûz[-ı dâ‘î-i devlet-i aliyyeleridir ki] Sâhib-i arzuhâl penbe iplikçisi Tavid v. Manok nâm zimmî İstanbul Mahkemesi’nden meclis-i şer‘-i münîrde derûn-ı arzuhâlde mastûrü’l-ism İplikçi Kosti v. Hristo zimmî muvâcehesinde zîr-i nezâret-i dâ‘iyânemde olan evkāfdan merhûm Kethüdâ Mehmed Ağa Vakfı mütevellîsi Ahmed Efendi tarafından vekîl-i şer‘îsi Derviş Hâfız Mehmed Efendi hâzır olduğu hâlde vakf-ı merkūm müsakkafâtından mahmiye-i mezbûrede Kumkapı kurbünde Muhsine Hatun Mahallesinde vâki‘ bi’l-icâreteyn mutasarrıf olduğum ma‘lûmü’l-hudûd bir bâb menzilimi mesfûr Kosti zimmîye re’y-i mütevellî ile ferağ ve tefvîz eylediğimde benim ma‘lûmü’l-esâmî kimesnelere olan bin dokuz yüz guruş düyûnumu ashâb-ı düyûnuma edâ etmek üzere emr etmemle mesfûr Kosti zimmî benim düyûn-ı mezkûremi edâ ettikte ben dahi emrimle ashâb-ı düyûnuma edâ ettiği meblağ-ı merkūmu her ne zamân kendüye edâ edersem menzil-i mezkûru yine re’y-i mütevellî ile bana ferağ etmek şartıyla sene-i sâbıkā şehr-i Recebi’l-ferdinin yirmi yedinci gününde vefâ-i ferağ ve tefvîz edüp lâkin mesfûr Kosti zimmî ashâb-ı düyûnuma meblağ-ı mezkûru edâ etmeyüp ol vechile mesfûr Kosti zimmîye zimmetinde kat‘â deynim olmadığından mâ‘adâ şart-ı mezkûr ile olan ferağ-ı merkūm dahi sahîh olmamağla suâl olunup menzil-i mezkûru yine bâ-re’y-i mütevellî geri bana ferağ ve tefvîz etmek üzere mesfûr Kosti zimmîye tenbîh olunmak matlûbumdur deyü da‘vâ ettikte mesfûr Kosti zimmî dahi cevâbında kaziyye minvâl-i muharrer üzere olduğunu bi-tamâmihâ tâyi‘an ikrâr u i‘tirâf etmeğin mûcebince menzil-i mezkûru re’y-i mütevellî ile yine müdde‘î-i mersûm Tavid zimmîye ferağ ve tefvîz etmek üzere mersûm Kosti zimmîye tenbîh olunduğu huzûr [-ı âlîlerine i‘lâm olundu.] Fî 5 S sene [12]37