İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 182 Hüküm no: 155 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mevlid Kandili münasebetiyle cami ve mescit minarelerinde kandil yakılması Îkād-ı kanâdil mevlüdü’n-Nebî i‘lâmı İstanbul Kādısı fazîletlü efendi İşbu i‘lâmınız rikāb-ı hümâyûn-ı mülûkâneye arz ile manzûr-ı mekâret-nüsûr-ı Hazret-i Padişâhî olmağla mûcebince leyle-i mezkûrede îkād-ı kanâdil olunmasına iktizâ edenlere tenbîhe mübâderet eyleyesin deyü [buyruldu]. Fî 3 Rebî‘ülevvel sene [1]237 Dergâh-ı felek-penâh ve bârgâh-ı adâlet-destgâh -dâme manzûran bi-inâyeti’llah- türâbına ma‘rûz-ı abd-i dâ‘î-i bî-iştibâhdır ki işbu sâl-ı bâhir-i yemîn ve’ş-şeref sene seb‘a ve selâsin ve mi’eteyn ve elf şehr-i Rebî‘ülevveli bi’r-rü’ye sâbite olmayup gurre-i Saferi’l-hayr yevm-i ehaddan mazbûta olduğundan gurre-i Rebî‘ülevvel yevm-i sülesâdan mu‘tebere olmağla seyyid-i veled-i ümm-i âdem bâ‘is-i âferînîş-i âlem mütfi-i nîrân-ı Mecûs mübtil-i âyîn-i erbâb-ı nâkus şehriyâr-ı tahtgâh-ı Istafâ Cenâb-ı Muhammedü’l-Mustafa aleyhi mine’s-salavât ezkâhâ ve mine’t-teslîmât enmâhâ efendimiz hazretlerinin şeb-i milâd-ı bâhirü’s-sa‘âdeleri işbu şehr-i merkūmun on ikincisi olan Cumartesi’ne tesâdüf etmeğin âdet-i hasene-i devlet-i aliyye üzere bu ni‘met-i celîle-i uzmâya teşekküren leyle-i mübâreke-i merkūmede minârât-ı cevâmi‘ ve mesâcid îkād-ı kanâdil ile tezyîn ve sürûr-endâz-ı kulûb-ı müminîn olunmak bâbında tenbîhi hâvî fermân-ı âlî sudûru iktizâ eylediği İstanbul Mahkemesi’nden atebe-i ulyâlarına i‘lâm olundu. Fî 3 Ra sene 1237]