İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 182 Hüküm no: 156 Orijinal metin no: [30b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şem‘î Hatun Vakfı ile Şîrmerd Çavuş vakfı mütevellileri arasındaki berber dükkânı nizaı için keşif Berber dükkânı keşfi Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlîlerine imtisâlen zikri âtî husûsun mahallinde lede’l-mu‘âyene keşf ve tahrîr ve istimâ‘ı içün savb-ı şer‘-i enverden me’zûnen irsâl Kâtib es-Seyyid Ahmed Rızâ Efendi dâ‘îleri hâssa mimarı hulefâsından Selim Sâbit ve es-Seyyid Mehmed Râşid Halîfeler ile İstanbul’da Aksaray çarşısında Gurabâ Hüseyin Ağa Mahallesinde kolluk-ı kebîr karşısında zikri âtî münâza‘un-fih olan bir bâb berber dükkânına varup huzûr-ı Müslimînde akd-i meclis-i şer‘-i âlî ettikte zîr-i nezâret-i dâ‘îlerinde olan evkāfdan Yusuf Paşa Çeşmesi civârında merhûm Şîrmerd Çavuş Mescid-i şerîfinin imâmı ve bi’l-meşrûta mütevellîsi sâhib-i arzuhâl es-Seyyid el-Hâc Ahmed Efendi b. es-Seyyid el-Hâc Hüseyin Efendi nâm kimesne [meclis-i] ma‘kūd-ı mezkûrda yine taht-ı nezâret-i dâ‘îlerinde [olan] evkāfdan merhûme Şem‘î Hatun Vakfı’nın mütevellîsi ve mahalle-i mezbûre câmi‘i imâmı derûn-ı arzuhâlde mezkûrü’l-ism es-Seyyid Abdurrahman Efendi b. es-Seyyid Mustafa nâm kimesne muvâcehesinde bi’l-mu‘âyene işbu derûnunda akd-i meclis-i şer‘-i âlî olunan bir tarafdan tabîb dükkânı ve bir tarafdan berber dükkânı ve bir tarafdan tarîk-i âm ile mahdûd ve beş kepenk bir bâb berber dükkânının zikr olunan berber dükkânı tarafında olan tûlen ve arzen terbî‘an on beş zirâ‘ bir parmak olarak iki kepenk mahalli an asl müstakillen kürkçü ve ba‘dehû tenekeci dükkânı olup ba‘dehû mukaddemâ harîkle muhterik oldukda zikr olunan berber dükkânına tenekeci dükkânı zam ve ilhâk olunup ol vechile bir bâb berber dükkânı olup ve dükkân-ı mezkûrun bâ-temessük-ı mütevellî bi’l-icâreteyn mutasarrıfı Berber es-Seyyid Ali Ağa b. es-Seyyid Mehmed bu esnâda bilâ-veled fevt ve dükkân-ı merkūm mahlûl ve bi’l-meşrûta mütevellîsi olduğum mârru’z--zikr Şîrmerd Çavuş Vakfı’na âid ve râyic olup lâkin zikr olunan Şem‘î Hatun Vakfı’nın mütevellîsi merkūm es-Seyyid Abdurrahman Efendi zikr olunan beş kepenk hâlâ berber dükkânı mecmû‘u benim mütevellîsi olduğum Şem‘î Hatun Vakfı müsakkafâtındandır deyü bi-gayr-ı hakkın zabt ve âhara icârıma mâni‘ olmağla suâl olunup mahâll-i merkūm âhara îcâr içün bana teslîme mütevellî-i merkūma tenbîh olunmak matlûbumdur deyü da‘vâ eylediğinde ol dahi cevâbında [31a] mahâll-i mezkûra bi’t-tevliye vaz‘-ı yedini ikrâr mâ‘adâyı ba‘de’l-inkâr müdde‘î-i mezbûr es-Seyyid el-Hâc Ahmed Efendi zikri mürûr eden berber dükkânı tarafında olan iki kepenk mahalli mimârân-ı mezbûrân mesâhalarıyla tûlen dört zirâ‘ on sekiz parmak ve arzen üç zirâ‘ dört parmak ki bi-hesâb-ı terbî‘i on beş zirâ‘ bir parmak mahalli müdde‘î-i mezbûr es-Seyyid el-Hâc Ahmed Efendi’nin mütevellîsi olduğu Şîrmerd Çavuş Câmi‘-i şerîfi vakfından olup mâ‘adâ zikr olunan tabîb dükkânı tarafında olan kezâlik mimârân-ı mezbûrân mesâhalarıyla tûlen dört zirâ‘ on sekiz parmak ve arzen dört zirâ‘ on dört parmak bi-hesâb-ı terbî‘i yirmi bir zirâ‘ on sekiz parmak mahalli mârru’z--zikr Şem‘î Hatun vakfından olarak bu vechile elli altmış seneden berü tasarruf oluna geldiğini ve civârında olan bî-garaz Müslimînden kuzâtdan el-Hâc Ebûbekir Efendi b. el-Hâc Hüseyin ve el-Hâc Mehmed Efendi b. el-Hâc Ahmed ve Altıncu İbrahim Ağa b. Mustafa ve Alemdâr b. Memiş Ağa b. Hüseyin ve Berber Mehmed Efendi b. Ali ve Buğdaycı İbrahim Ağa b. Ali ve Berber İsmail Ağa b. Süleyman ve Çubukçu es-Seyyid Osman Ağa b. Mehmed nâm kimesneler ta‘yîn ve irâe ederek şehâdetleriyle bi’l-muvâcehe vech-i şer‘î üzere isbât etmeğin mûcebince sâlifü’l-beyân berber dükkânı tarafında olan iki kepenk on beş zirâ‘ bir parmak mahal Şîrmerd Çavuş vakfından ve mâ‘adâ tabîb dükkânı tarafında olan üç kepenk yirmi bir zirâ‘ on sekiz parmak mahal Şem‘î Hatun vakfından olmak üzere zabt olunmak iktizâ eylediğini tarafeyne ba‘de’t-tefhîm kâtib-i merkūm mahallinde ketb ve tahrîr ve ma‘an meb‘ûs ümenâ-i şer‘le meclis-i şer‘a gelüp alâ-vukū‘ihi inhâ ve takrîr eylediği İstanbul Mahkemesi’nden huzûr [-ı âlîlerine i‘lâm olundu.] Fî 29 S sene 1237