İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 184 Hüküm no: 157 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serkiz v. Kalos’un, ipekçi dükkânı gediğini Ebûbekir Ağa b. Hüseyin’e sattığı Bir bâb oda mübâya‘ası yedi bin guruşa Ma‘rûz[-ı dâ‘î-i devlet-i aliyyeleridir ki] Kazzâz esnâfından Serkiz v. Kalos nâm zimmî meclis-i şer‘-i münîrde esnâf-ı merkūme kethüdâsı Abdüllatif Ağa hâzır olduğu hâlde bâ‘isü’l-i‘lâm Ebûbekir Ağa b. Hüseyin nâm kimesne muvâcehesinde takrîr-i kelâm edüp İstanbul’da Mercan çarşısında İplikçi Mehmed Ağa ve tuhafcı dükkânları beynlerinde vâki‘ iki kepenk bir bâb kazzâz dükkânı derûnunda mevcûde bir gedik i‘tibâriyle başmuhâsebede mukayyed gedik tâ‘bir olunur akd-i âti’z-zikrin sudûruna değin bir kıt‘a sûret mantûkunca müstakillen yedimde mülküm olan âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan bi-safkatin vâhidetin mezbûr Ebûbekir Ağa’ya yedi bin guruş semen-i medfû‘ ve makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl etmekle mebî‘-i mezkûrun tağrîr ve gabnine müte‘allika âmme-i de‘âvîden tarafeynden her birimiz âharın zimmetini ibrâ-i âm ile kabûlü hâvî ibrâ ve iskāt etmemizle ba‘de’l-yevm âlât-ı lâzıme-i mezkûrede benim kat‘an alâka ve medhalim kalmayup mezbûr Ebûbekir Ağa’nın mülk-i müşterâsı olmuşdur deyü ba‘de’l-ikrâr ve’t-tasdîk mezbûr Ebûbekir Ağa âlât-ı lâzıme-i mezkûrenin kaleminde mersûm Serkiz zimmî üzerine olan kayd-ı atîki ref‘ ve terkīn-birle kendi ismine kayd ve yedine müceddeden bir kıt‘a sûret i‘tâsı bâbında istid‘â-yı inâyet etmeğin istid‘âsı üzere gedik-i mezkûrun mesfûr Serkiz zimmî üzerinde olan kaydı ref‘ ve müşteri-i mezbûr Ebûbekir Ağa ismine kayd ile sûret i‘tâ buyrulmak iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 8 Ra sene 1237