İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 184 Hüküm no: 158 Orijinal metin no: [31a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın, İzmir’de Urla kasabası esnâf şeyhliği iddiası Urla kasabasının esnâf şeyhliği istid‘âsı Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlîlerine imtisâlen işbu istid‘â ve derkenâra nazar olundukta medîne-i İzmir muzâfâtından Urla kasabasının esnâf şeyhliğine sâhib-i arzuhâl Ahmed bâ-berât-ı âlîşân mutasarrıf olup kimesne tarafından müdâhale olunduğu yoğiken bu esnâda nefs-i İzmir’in ber-vech-i mâlikâne esnâf şeyhi olan Ahmed Ağa nâm kimesne kasaba-i mezbûrenin esnâf şeyhliği dahi benim mukāta‘am dâhilindedir deyü tarafından adam irsâl edüp zabıt dâ‘iyesiyle rencîdeden hâlî olmadığından bahisle merkūmun bî-vech vâki‘ olan müdâhalesi mahallinde ma‘rifet-i şer‘le men‘ ve def‘ olunmak içün bir kıt‘a emr-i âlî sudûru bâbında istirhâm eylediği meâl-i arzuhâlden ve İzmir’de Urla kasabasında esnâf şeyhliği bin iki yüz altı senesi Rebî‘ülevvelinde verilen berât-ı âlîşân ile ba‘dehû vâki‘ olan cülûs-ı hümâyûn-ı meymenet-makrûnunda dahi tecdîd buyrularak hâlâ sâhib-i arzuhâl Ahmed b. Hacı Mustafa’nın üzerinde idüğü askerî rûznâmçesinden tahrîr olunan derkenârdan ve şeyhlik-i esnâf-ı İzmir dört bin beş yüz guruş mu‘accele ve senevî iki yüz guruş mâl ile ber-vech-i mâlikâne silâhşorân-ı hâssadan Ahmed Ağa’nın uhdesinde mukayyed olup İzmir esnâf şeyhliği mezbûrânı? kaydı bulunmadığı dahi mâlikâne derkenârından müstebân olup bu takdîrce mâlikâne derkenârı mantûkunca İzmir esnâf şeyhliğine mutasarrıf olan mezbûr Ahmed Ağa’nın Urla kasabası esnâf şeyhliği benim mukata‘am dâhilindedir deyü müdâhalesi bî-vech olmağla sâhib-i arzuhâlin istid‘âsı üzere vâki‘ olan bî-vech te‘addîsi mahallinde ma‘rifet-i şer‘le men‘ olunmak bâbında fermân-ı âlîşân sudûru muktezâ-yı maslahat idüğü İstanbul Mahkemesi’nden huzûr [-ı âlîlerine i‘lâm olundu.] Fî 8 Ra sene 1237