İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 187 Hüküm no: 160 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Peştamâlcı Ömer Usta b. Ebûbekir’in, nizama uymasına ve esnafına itâate tenbih Esnâfına itâ‘ate tenbîh Ma‘rûz[-ı dâ‘î-i devlet-i aliyyeleridir ki] Âsitâne-i aliyyede vâki‘ peştamâl nesc ve i‘mâl eden esnâfın kethüdâları es-Seyyid Ömer Ağa b. es-Seyyid Osman ve Yiğitbaşı Ali Usta ve esnâfından el-Hâc Ali Ağa ve el-Hâc Yusuf Ağa ve es-Seyyid Ahmed Efendi ve Halil Usta ve sâir mazbûtü’l-esâmî kimesneler meclis-i şer‘-i münîrde esnâf-ı merkūmeden Ömer Usta b. Ebûbekir muvâcehesinde merkūm Ömer Usta esnâfımızdan olup Âsitâne-i aliyyede Kırkçeşme kurbünde Peştemâlciler Hanı derûnunda kâin bir bâb odada vâki‘ destgâhında nesc ve i‘mâl eylediği peştemâllerini beynimizde cârî fiyatımızdan ziyâdeye âhara bey‘e ihtiyâr eylediğinde bu makūle hareketi ihtilâl-i nizâmı mûcib olacağını bi’d-defa‘ât kendüye ifâde ve tenbîh eylediğimizde ve kat‘â mütenebbih olmayup fâriğ olmadığından mâ‘adâ her birimize ta‘ziri mûcib şütûm-ı galîza ile şetm edüp ol vechile beyne’l-esnâf dahi şikāk ve ihtilâli mûceb hâlât vukū‘una bâ‘is olduğundan nâşî kā‘ide-i esnâf üzere li-ecli’t-tedîb odasını sed eylediğimizde yine cümlemize itâle-i lisandan fâriğ olmayup ol vechile kendiden emniyetimiz meslûb olmağla esnâfımızdan ihrâc olunmasını iltimâs etmişdik el-hâletü hâzihî beynimiz tevfîk ve ıslâh olunup ber-vech-i muharrer mezbûrun esnâfından ihrâcı iltimâsımızdan fâriğler ve odasını feth ve küşâda müte‘ahhidler olduğumuzda mezbûr Ömer Usta dahi fîmâ ba‘d hilâf-ı şürût-ı nizâm hareket etmeyüp ve esnâfımızdan kimesneye itâle-i lisân etmemek üzere ta‘ahhüd ve eğer hilâf-ı ta‘ahhüd hareket eder ise tedîb olunmasına râzı oldu deyü takrîrlerini merkūm Ömer Usta tasdîk ve ber-vech-i meşrûh ta‘ahhüd eylediği İstanbul Mahkemesi’nden huzûr [-ı âlîlerine i‘lâm olundu.] Fî 8 Ra sene 1237