İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 193 Hüküm no: 166 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Erzurum’dan İstanbul’a getirilen koyunların kasap esnafına dağıtımı Ağnâm tevzî‘inin i‘lâmı Ma‘rûz[-ı dâ‘î-i devlet-i aliyyeleridir ki] Erzurum celebânından Altıkulac Mehmed Bey b. Hüseyin kendi nefsinden asâleten ve Kaloğlu Mustafa Bey ve Yusufoğlu Hüseyin ve İlyas ve Ramazan ve Kalpakoğlu Molla ve Mehmed oğlu Ali ve Hacı Mehmed ve Cihânbeyli Ahmed oğlu Süleyman ve Topal Halil ve Hacı Babuhan oğlu Ali ve Horosoğlu Mehmed ve Esad Bey ve Timur taraflarından vekâleten İshakoğlu Mehmed Bey kezâlik asâleten hâzır olduğu hâlde meclis-i şer‘-i münîrde kasab ustalarından Eğrikapu kethüdâsı es-Seyyid el-Hâc Osman Efendi ve Edirnekapılı İbrahim Ağa ve Topkapılı Mustafa Ağa ve Eyüblü Molla Feyzullah ve Hasköylü Mehmed Ağa ve es-Seyyid el-Hâc İbrahim Ağa ve es-Seyyid Hasan Efendi ve Mimarlı Mehmed Ağa ve Mercanlı el-Hâc Ali Ağa ve diğer Mimarlı Mehmed Ağa ve sâirleri hâzır oldukları hâlde kassabân esnâfının kethüdâsı el-Hâc Hasan Ağa b. el-Hâc Osman mahzarında bi’l-asâle ve bi’l-vekâle takrîr-i kelâm edüp ben mâlımdan dokuz yüz re’s ve bir def‘a dokuz yüz re’s ve müvekkillerim mezbûr Kaloğlu Mustafa Bey iki bin re’s ve mezbûr Yusuf oğlu Hüseyin dokuz yüz ve ve def‘a mezbûr Hüseyin dokuz yüz re’s ve mezbûr İlyas dokuz yüz re’s ve mezbûr Ramazan sekiz yüz re’s ve def‘a mezbûr Ramazan sekiz yüz elli re’s ve mezbûr Kalpakoğlu Molla dokuz yüz re’s ve mezbûr Mehmed oğlu Ali dokuz yüz re’s ve mezbûr Hacı Mehmed sekiz yüz re’s ve hâzır-ı mezbûr İshak oğlu Mehmed Bey asâleten dokuz yüz re’s ve def‘a mezbûr Mehmed Bey sekiz yüz re’s Cihânbeyli Ahmed oğlu Süleyman dokuz yüz re’s ve def‘a mezbûr Ahmed oğlu Süleyman dokuz yüz re’s ve mezbûr Topaloğlu Halil yedi yüz re’s ve mezbûr Hacı Babuhan oğlu Ali sekiz yüz re’s ve mezbûr Horosoğlu Mehmed sekiz yüz re’s ve mezbûrdan Esad Bey ve Mehmed ve Timur’un altı bin re’s ki cem‘an Erzurum cânibinden Âsitâne-i aliyyeye sevk ve tesyîr eylediğimiz yirmi iki bin dört yüz elli re’s Karaman ağnâmımızın bâ-fermân-ı âlî verilen nizâm üzere lühûmun beher kıyyesini kassabâna otuz yedi para ve kuyruklarının beher kıyyesini elli para ve ağnâm sakatlarını on para ve ber-mûceb-i nizâm Bosna celebleri dört gün ve bizim ağnâmımızı sekiz gün kassabân esnafına tevzî‘ ve ağnâm-ı mezkûrenin mikdâr ve semenlerini mübeyyin yaftalarını hîn-i tevzî‘den otuz bir gün mürûrunda biz teslîme kethüdâ-yı merkūm ve akçelerini hîn-i tevzî‘den elli bir gün mürûrunda bize tamamen îfâya ve lühûmun beher kıyyesini narh-ı cârî üzere kırkar paraya ve kuyruğun beher kıyyesini elli üçer paraya ibâdullâha bey‘a hâlâ hâssa kasabbşısı efendi hazretlerinin inzımâm-ı re’yi ile esnâf-ı merkūmûn ta‘ahhüd ve tarafeynden her birimiz âharın ta‘ahhüdünü kabûl eyledik dediklerini kethüdâ-yı merkūm ba‘de’t-tasdîk ber-mûceb-i nizâm tevzî‘a ta‘ahhüd eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 29 S sene 1237