İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 194 Hüküm no: 167 Orijinal metin no: [33a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Donanma-yı Hümâyûn için tiftik bükmesi imâl eden esnaf ile kazzâz esnâfından ibrişim ve iplik bükücü esnafının sulh oldukları Donanma-yı Hümâyûn içün tiftik bükmesinin mu‘ârazadan men‘i Ma‘rûz[-ı dâ‘î-i devlet-i aliyyeleridir ki] Donanma-yı hümâyûn kalyonları bâdbânları lâzımesi içün nesc ve i‘mâl olunan yelken bezlerine ötedenberü Tersâne-i âmirede ve Samatya Yedikule’de vâki‘ dört aded kârhâne ve meyâne tâ‘bir olunur âlât ile erişlik ve argışlık penbe ve keten ve tiftik bükmesi i‘mâl eden altı nefer usta ve yirmi altı nefer kalfalardan derûn-ı arzuhâlde isimleri mastûr Mustafa Ağa b. Abdullah ve Usta Artin v. Serkiz ve Haçador v. Toros ve Karabet v. Ohan ve Yoseb v. Parsih ve Nişan v. Melkon ve Kegork v. Kerupe ve Serope v. Vartan zimmîler İstanbul mahkemesinde meclis-i şer‘-i münîrde Âsitâne-i aliyyede vâki‘ kazzâz esnâfına ibrişim ve iplik bükücü esnâfından ashâb-ı arzuhâl İsak v. Yako ve Nesim v. Avram ve Avram v. İsrail ve diğer Avram v. Mosil ve Menteş v. Avram ve Mosi v. İsak ve Nesim v. Rafeyil ve diğer Mosi v. Kamal ve İsak v. Hayim ve Hayim v. Secor ve Samoyil v. İsak ve sâirleri muvâcehelerinde biz ber-vech-i muharrer Tersâne-i âmire levâzımından olan yelken bezi içün erişlik ve argışlık penbe ve keten ve tiftik bükmesi iplik büküp lüzûmu mikdârını Tersâne-i âmireye ve mâ‘adâsını sâir lüzûmu olan tüccâr sefâyini ashâbına bey‘ edüp lâkin tiftik bükmesi bizim san‘atımızdan olduğuna binâen ve ahd-i garipte îcâr olunan yün ipliği tâ‘bir olunur nisvânın havlu ve makreme işledikleri ipliği dahi âlât-ı mezkûremizle biz i‘mâl edüp te‘ayyüş ede gelir iken mesfûrûn dahi âlât-ı mezkûreyi isti‘mâl eylediklerinden nâşî yün ipliği büküp san‘atımıza müdâhalelerden mâ‘adâ penbe ve keten dahi bükmeleriyle men‘ olunmaları matlûbumuzdur deyü da‘vâya tasaddî ile münâza‘at-ı kesîre vukū‘undan sonra beynimiz tevfîk ve ıslâh olunup fîmâ ba‘d tarafeynden her birimiz âharın i‘mâl eyledikleri san‘atlarına müdâhale etmeyüp her birlerimiz me’lûf olduklarımız san‘atımızı i‘mâl etmek ve ihtilâl-i nizâmı mûcib harekete tasaddî etmemek üzere her birerlerimiz ta‘ahhüd ve ittifâk ile kat‘-ı nizâ‘ eyledik deyü bi’l-muvâcehe takrîr ve tasdîkleri tescîl ve huzûr [-ı âlîlerine i‘lâm olundu.] Fî 26 S sene 1237