İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 195 Hüküm no: 168 Orijinal metin no: [33a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeron v. Serkiz’in, Yahya Efendi vakfına olan borcunu ödemeyi taahhüt ettiği Habbâzân Ma‘rûz[-ı dâ‘î-i devlet-i aliyyeleridir ki] Mahrûse-i Galata kādıları fazîletli efendiler dâ‘îleri taht-ı nezâretlerinde olan evkāfdan Kutbü’l-ârifîn merhûm Yahya Efendi Evkāfının bi’l-meşrûta mütevelliyesi sâhibe-i arzuhâl Şerîfe Âişe Hanım bt. Hâcegân-ı Dîvân-ı Hümâyûndan Mustafa Efendi b. Abdullah’ın sadrî kebîr oğlu ve tarafından husûs-ı âtîde vekîl olduğu zâtı mûmâ-ileyhâyı ârifân el-Hâc Ömer Ağa b. Ahmed ve Mehmed Ağa b. Ali nâm kimesneler şehâdetleriyle ber-nehc-i şer‘î sâbit olan müderrisin-i kirâm-ı zevi’l-ihtirâmdan es-Seyyid Mustafa Şerîf Efendi b. el-Mevlâ el-merhûm Konevî İmâmzâde es-Seyyid Mehmed Said Efendi meclis-i şer‘-i münîrde mahrûse-i mezbûreye muzâfe kasaba-i Beşiktaş’a tâbi‘ Kılıç Ali Paşa nâm mahalde kâin bir bâb habbâz fırınının müsteciri olup derûn-ı arzuhâlde mastûr merhûm-ı mûmâ-ileyh vakfı müsakkafâtından zikri âtî bir bâb diğer fırına dahi fuzûlî vaz‘-ı yedi mütehakkık olan Habbâz Zeron v. Serkiz nâm zimmî muvâcehesinde habbâzân kethüdâsı Mehmed Efendi b. Ali ve esnâf-ı merkūmenin nizâm ustaları olan ve sâir mazbûtü’l-esâmî nâm kimesneler hâzır oldukları hâlde merhûm-ı mûmâ-ileyh Yahya Efendi hazretlerinin evkāf-ı şerîf[e]leri müsakkafâtından zikr olunan Kılıç Ali Paşa kurbünde vâki‘ kadîmden bu ana gelince aklâmdan birinde mukayyed gedik i‘tibârı olmayarak fi’l-asl habbâz fırını olup müddet-i vâfireden berü mu‘attal olan ma‘lûmü’l-hudûd bir bâb fırın içün muharrer derûnunda fırın vardır ve Kılıç Ali Paşa’da [33b] vâki‘ habbâz fırınına merbûtdur diyerek mesfûr Zeron zımmi bin iki yüz otuz beş senesi Şevvâli’l-mükerremi gurresinden işbu sene-i mübâreke Muharremi’l-harâmı gāyetine gelince on yedi ayda fuzûlî zabt ve kendi fırınından nân-ı azîz nakl ve bey‘ edüp ve fırın-ı mezkûru cânib-i vakıfdan âhar san‘at erbâbına vakf-ı şerîf içün mütevelliye-i müvekkile-i mûmâ-ileyhânın icârına mümâna‘at etmekle suâl olunup fırın-ı mezkûrdan keff-i yed ve müvekkile-i mûmâ-ileyhâya teslîme ve müddet-i mezkûrede vakıf içün lâzım gelen ecr-i mislini dahi edâya mesfûr Zeron zimmîye tenbîh olunmak bi’l-vekâle matlûbumdur deyü da‘vâya tasaddî eylediğimde fi’l-hakīka zikr olunan fırın el-yevm harâb ve isti‘mâle nâ-kabîl olup derûnunda aklâmın birinde mukayyed olarak gedik ve tabla ve peşgûn i‘tibârları ve zikr olunan Kılıç Ali Paşa fırınına merbûtiyeti olmadığı ve müddet-i mezkûrede ber-vech-i meşrûh fuzûlen zabt eylediği diğer arzuhâl hâmişinde mastûr derkenârlar mantûku üzere mesfûr Zeron zimmînin ikrârıyla zâhir ve mütehakkık olduğundan mâ‘adâ kethüdâ ve hâzirûn bi’l-meclis olan nizâm ustaları dahi meclis-i şer‘de haber verdiklerinden sonra zikr olunan fırın-ı habbâz ve çörekçinin gayrı âhar san‘at erbâbına icâra mümâna‘at etmemek üzere müvekkile-i mütevelliye-i mûmâ-ileyhâya teslîme ve müddet-i mezkûrede ecr-i misli olduğunu bi’t-tasâduk mütehakkık olan yüz guruşu dahi vakf-ı şerîf-i mûmâ-ileyh içün müvekkile-i mütevelliye-i mûmâ-ileyhâya edâya mesfûr Zeron zimmî ta‘ahhüd eyledi deyü vekîl-i mûmâ-ileyhin sâdır olan bi’l-cümle takrîrini kethüdâ ve nizâm ustaları mezbûrûn ile mesfûr Zeron zimmî tasdîk ve fırın-ı mezkûr ile meblağ-ı mezbûr yüz guruşu ber-vech-i muharrer edâ ve teslîme ta‘ahhüd eylediği İstanbul Mahkemesi’nden huzûr [-ı âlîlerine i‘lâm olundu.] Fî 14 S sene 1237