İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 198 Hüküm no: 170 Orijinal metin no: [33b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Süleyman’ın, Büyükdere’deki un değirmenini Mehmed Said Ağa ile kardeşi Ali Ağa’ya sattığı Büyükdere’de habbâzân esnâfının istid‘âsı Ma‘rûz[-ı dâ‘î-i devlet-i aliyyeleridir ki] Mahmiye-i İstanbul’da merhûm Sultan Selim Hân -aleyhi’r-rahmetü ve’l-gufrân- Câmi‘-i şerîfi kurbünde Çırâğī Hamza Mahallesi’nde sâkin dergâh-ı âlî -dâme mahfûfen bi’l-me‘âli-de sekbanbaşı esbak Mustafa Ağa b. Süleyman b. Abdullah tarafından husûs-ı âtîde ikrâra vekîl olduğu Ali Efendi b. Halil ve Hâfız Mehmed Emin Efendi b. Abdullah şehâdetleriyle ber-nehc-i şer‘î sâbit olan el-Hâc Ahmed Efendi b. Mehmed meclis-i şer‘-i münîrde uncular kethüdâsı İbnü’l-Hâc Hüseyin ve nizâm ustaları mazbûtü’l-esâmî kimesneler ile kapan-ı dakīk tüccârından Kırımîzâde es-Seyyid el-Hâc Musa Ağa b. el-Hâc İsmail ve Bağdâdîzâde İbrahim Ağa b. el-Hâc Mehmed Emin ve Çetecizâde es-Seyyid İbrahim Ağa b. el-Hâc Hüseyin hâzır oldukları hâlde kendi nefsinden asıl ve karındaşı Ali Ağa tarafından husûs-ı âti’l-beyânı tasdîka vekîl-i şer‘îsi Mehmed Said Ağa b. Mehmed muvâcehesinde müvekkilim mûmâ-ileyh Mustafa Ağa mahrûse-i Galata’ya muzâfe İstinye nâhiyesine tâbi‘ Büyükdere karyesinde vâki‘ bir tarafdan Niko zimmî menzili ve tarafeyni bundan akdem Rum tâifesinden zuhûr eden fesâd ve hıyânetde medhali olup i‘dâm olunan Eskanadi Nikolaki nâm hâinin cânib-i mîrîden zabt buyrulan emlâk-ı sâiresi ve bir tarafı tarîk-i âm ile mahdûd iki kepenkli bir bâb uncu değirmeni derûnunda mevcûde gedik tâ‘bir olunur âlât-ı lâzimesi ile bir cümle arsa ve binâsı hâlik-i mesfûr İsfenadi zimmînin yedinde mülkü iken hâlik oldukda emlâk-ı sâiresi ile [34a] cânib-i mîrîden ba‘de’z-zabt işbu târih-i i‘lâm senesi Saferi’l-hayrının on sekizinci günü tarihiyle müverrah yedimde olan bir kıt‘a mülknâme-i hümâyûn mûcebince semen-i medfû‘ ve makbûza iştirâ ve kabz edüp ol vechile akd-i âti’z-zikrin sudûruna değin yedimde mâlım ve mülküm olmağla ben zikr olunan değirmenin bi’l-cümle arsa ve binâsını iki bin guruşa ve derûnunda beyne’l-esnâf sekiz bârgir i‘tibâriyle gedik tâ‘bir olunur âlât-ı lâzıme-i ma‘lûmeyi altı bin guruşa ki cem‘an sekiz bin guruş semen-i makbûza mülknâme-i hümâyûnda muharrer şürûta ri‘âyet etmemek [etmek] üzere tarafeynden bi’l-emr ve’l-kabûl şürût-ı müfsideden ârî bâtten ve sahîhan bi-safkatin vâhidetin asıl-ı mezbûr Mehmed Said ile karındaşı müvekkil-i merkūm Ali Ağa’ya nısfiyet üzere iştirâken bey‘ ve temlîk ve teslîm eylediğimde onlar dahi iştirâken iştirâ ve temellük ve tesellüm ve kabz ve kabûl ve mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt etmemizle fîmâ ba‘d değirmen-i mezkûrun arsa ve binâ ve kezâlik âlât-ı lâzımesinde benim kat‘â alâka ve medhalim kalmayup asıl-ı merkūm Mehmed Said Ağa ile karındaşı müvekkil-i mezbûr Ali Ağa’nın iştirâken mülk-i müşterâları olmuşdur dedi deyü vekîl-i merkūmun eylediği takrîrini asıl ve vekîl-i mezbûr Mehmed Said Ağa ba‘de’t-tasdîk zikr olunan iki horos uncu değirmeninin mukaddemâ hâlik-i mesfûr İskanadi üzerinde olan kaydı kaleminden ref‘ ve terkīn ve kendi ile karındaşı müvekkil-i mezbûr Ali Ağa’nın üzerlerine kayd ile yedlerine sûret i‘tâ buyrulmak bâbında istid‘â-yı inâyet eylediği İstanbul Mahkemesi’nden huzûr [-ı âlîlerine i‘lâm olundu.] Fî 15 Ra sene 1237