İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 199 Hüküm no: 172 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Silistre nâzırı Halil Ağa vakfı tevliyetinin Şerîfe Hadice Hanım bt. Abdullah’a tevcihi Vakfiye emr-i âlî istid‘âsı tevcîh olunmuşdur Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlîlerine imtisâlen işbu arzuhâl ve derkenâra ba‘de’n-nazar sâhibe-i arzuhâl zâtı mu‘arrefe Şerîfe Hadice Hanım bt. el-Hâc Abdullah İstanbul mahkemesinde meclis-i şer‘-i münîrde derûn-ı arzuhâl derkenârda zikr olunduğu üzere sevâhil-i nehr-i Tuna’da vâki‘ medîne-i Yerköy’de Baba Nuh Mahallesinde ashâb-ı hayrâtdan Silistre nâzırı esbak ceddim merhûm el-Hâc Halil Ağa b. Salih Ağa binâ ve ihyâ ve vakf eylediği câmi‘-i şerîf ve kütüphâne ve mekteb ve sebîlhâne ve maslak evkāfının yedinde olan bir kıt‘a vakfiye-i ma‘mûlün-bihâsında yevmî yirmi akçe vazîfe ile tevliyetini hayâtında oldukça kendi nefsine ve ba‘de vefâtihi erşed ebnâsına ve ba‘dehum erşed ebnâ-yı ebnâsına ve ba‘dehum erşed ebnâ-yı ebnâ-yı ebnâsına karnen ba‘de karnin ve neslen ba‘de neslin ve ba‘de’l-inkırâz aslah utekā ve ebnâ-yı utekā ve ebnâ-yı ebnâ-yı utekāsında karnen ba‘de karnin şart ve ta‘yîn edüp ba‘dehû tevliyet-i mezkûreye vâkıf-ı merkūm el-Hâc Halil Ağa hayâtında meşrûtiyet üzere bâ-berât-ı âlîşân mutasarrıf iken bin yüz seksen üç senesi hılâlinde fevt oldukda erşed ebnâsından vâkıf-ı merhûm-ı mezbûr el-Hâc Halil Ağa’nın sulbî oğlu Hacı Çelebi demekle ma‘rûf babam el-Hâc Abdullah Ağa tevliyet-i merkūmeyi vazîfe-i mersûmesiyle sene-i sâbıkā şehr-i Ramazani’l-mübâreki evâsıtına gelince şürût-ı vâkıf üzere şer‘an bi-lâ-berât zabt ve tasarruf ve umûr-ı vakf-ı mezkûru rü’yet şehr-i merkūm evâsıtında babam merkūm el-Hâc Abdullah Ağa dahi fevt olup tevliyet-i merkūme mahlûle oldukda ceddim vâkıf-ı merkūmun bi’l-cümle ebnâsı ve ebnâ-yı ebnâ-yı ebnâsı ve utekā ve ebnâ-yı utekā ve ebnâ-yı ebnâ-yı utekā ve ebnâ-yı ebnâ-yı ebnâ-yı utekāsı bi’l-külliye münkırlar olup ol vechile meşrûtun-lehümden kimesne kalmayup ben ber-vech-i muharrer vâkıf-ı merhûm-ı mezbûrun oğlu müteveffâ-i mezbûr Hacı Çelebi demekle ma‘rûf el-Hâc Abdullah Ağa’nın sulbiye kızı ve evlâd-ı evlâd-ı vâkıfdan ve umûr-ı vakfı idâre ve rü’yete muktedire olmamla takrîr-i meşrûham ba‘de’t-tahkīk tevliyet-i mezkûre vazîfe-i mersûmesiyle ecânibe tevcîh buyrulmayup ceddim ve babam müteveffiyân-ı mezbûrânın mahlûllerinden bana tevcîh ve yedime berât-ı şerîf-i âlîşân sadaka ve ihsân buyrulmak bâbında istid‘â-yı inâyet eylediğim i‘lâm olunmak matlûbumdur dedikde mezbûre Şerîfe Hadice Hanım’ın bi’l-cümle takrîr-i meşrûhu vâkı‘a mutâbık idüğü medîne-i mezbûre ahâlîsinden ve esen ve ihtiyârlarından Halil Efendi b. Hasan ve el-Hâc Derviş Ahmed Ağa b. Halil ve es-Seyyid Ahmed Efendi b. İsmail nâm mevsûku’l-kelîm Müslimînin bi’l-muvâcehe alâ-tarîkı’ş-şehâde haber vermeleriyle zâhir ve mütehakkık olmağın bu takdîrce meşrût olan evkāfda meşrûtun-lehüm münkır olup tevliyeti mahlûle oldukda evlâd-ı evlâd-ı vâkıfdan umûr-ı vakfı idâreye muktedir kimesne mevcûd iken ecânibe tevcîh olunup her ne kadar meşrûtun-lehümden değil ise dahi yine evlâd-ı vâkıfa tevcîh olunmak muktezâ-yı şer‘-i şerîf olmağla tevliyet-i merkūme yevmî yirmi akçe vazîfesiyle vâkıf-ı müteveffâ-i mezbûr el-Hâc Halil Ağa ile oğlu müteveffâ-i merkūm el-Hâc Abdullah Ağa’nın mahlûllerinden oğlunun kızı mezbûre Şerîfe Hadice Hanım’a tevcîh ve yedine berât-ı şerîf-i âlîşân sadaka ve ihsân buyrulmak iktizâ eylediği mahkeme-i mezbûreden huzûr [-ı âlîlerine i‘lâm olundu.] Fî 20 Ra sene 1237