İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 202 Hüküm no: 174 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Ağa, Eyüb Ağa ve Mustafa Ağa’nın, Mehmed Ağa, Eski Hüseyin Ağa ve Çolak Ali Odabaşı aleyhine açtıkları davalarının reddedildiği Ma‘rûz[-ı dâ‘î-i devlet-i aliyyeleridir ki] Âsitâne-i aliyyede vâki‘ külahçı esnâfının kethüdâları es-Seyyid el-Hâc İbrahim Efendi ve Yiğitbaşı es-Seyyid Halil ve fes külahı bey‘ eden esnâfından Ömer Ağa ve Eyüb Ağa ve Mustafa Ağa İstanbul mahkemesinde meclis-i şer‘-i münîrde fes külahı bey‘ eden esnâfından Mehmed Ağa b. Mehmed ve Eski Hüseyin Ağa b. Mehmed ve Çolak Ali Odabaşı b. İbrahim nâm kimesneler muvâcehelerinde esnâfımızın Âsitâne-i aliyyede i‘mâl eylediğimiz fes külahlarından mâ‘adâ mahrûse-i Bursa ve memâlik-i sâireden tüccârının Âsitâne-i aliyyeye getirdikleri fes külahlarını esnâfımız beyninde halen ve tahammüllerimize göre tevzî‘ tarîkiyle tüccârından iştirâ-birle dükkânımızda ibâdullâha bey‘ etmek âdet-i kadîmemizden iken mezbûrûn Mehmed Ağa ve Eski Hüseyin Ağa ve Çolak Ali Odabaşı bu esnâda kendi halleriyle mahrûse-i Bursa’dan getirdikleri ma‘lûmü’l-mikdâr fes külahlarını âdetimize mugāyir cümle esnâfa tevzî‘ etmeyüp her biri müstakillen kendi dükkânında bey‘ etmekle suâl olunup her birinin mâlı olarak getirdiği fes külahlarını âdet-i kadîmemize binâen esnâfımız beyninde tevzî‘ etmek içün merkūmûna cebr olunsun deyü takrîr-i meşrûhları üzere tasaddî eyledikleri da‘vâları meşrû‘a ve iltifâta şâyân olmamağla ol vechile merkūmûna suâl dahi teveccüh etmeyüp mûcebiyle müdde‘ûn-ı merkūmûn da‘vâ-yı mezkûreleriyle mezbûrûn Mehmed Ağa ve Eski Hüseyin Ağa ve Çolak Ali Odabaşı’ya bî-vech-i şer‘î mu‘ârazadan men‘ olundukları mahkeme-i merkūmeden huzûr [-ı âlîlerine i‘lâm olundu.] Fî 24 S sene 1237