İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 202 Hüküm no: 175 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bedros v. Meldon’un, oda gediğini Abdullah Ağa b. Abdullah’a sattığı 2.000 guruşa oda gediği Ma‘rûz[-ı dâ‘î-i devlet-i aliyyeleridir ki] Hâzırcı çukacı esnâfından Bedros v. Meldon nâm zimmî meclis-i şer‘-i münîrde ustabaşıları Kirkor v. Papla zimmî hâzır olduğu hâlde Enderûn-ı hümâyûnda Çukadarî-i hazret-i şehriyârîden muhrec bâ‘isü’l-i‘lâm Abdullah Ağa b. Abdullah nâm kimesne tarafından husûs-ı âtîde tasdîka vekîli el-Hâc Mehmed Ağa b. Abdullah mahzarında takrîr-i kelâm edüp İstanbul’da Çarşı-yı Kebîr’de vâki‘ Emir …?oğlu sûkunda bir tarafdan hâzırcı ve bir tarafdan fesci dükkânı ile mahdûd iki kepenkli bir bâb hâzırcı dükkânı derûnunda bir gedik i‘tibâriyle kaleminde mukayyed beyne’l-esnâf gedik tâ‘bir olunur akd-i âti’z-zikrin sudûruna değin bir kıt‘a sûret mantûkunca müstakillen yedimde mülküm olan âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan bi-safkatin vâhidetin müvekkil-i merkūm Abdullah Ağa’ya iki bin guruş semen-i medfû‘ ve makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl etmekle mebî‘-i mezkûrun tağrîr ve gabnine müte‘allika âmme-i de‘âvîden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt etmemizle fîmâ ba‘d âlât-ı lâzıme-i mezkûrede benim kat‘â alâka ve medhalim kalmayup müvekkil-i mezbûr Abdullah Ağa’nın mülk-i müşterâsı olmuşdur deyü ba‘de’l-ikrâr ve’t-tasdîk âlât-ı lâzıme-i mezkûrenin kaleminde mesfûr Bedros zimmî üzerine olan kayd-ı atîki ref‘ ve terkīn-birle müvekkil-i mezbûr Abdullah Ağa ismine kayd ve yedine müceddeden bir kıt‘a sûret i‘tâsı bâbında vekîl-i merkūm istid‘â-yı inâyet etmeğin istid‘âsı üzere gedik-i mersûm Bedros zimmî üzerine olan kaydı ref‘ ve müşteri-i müvekkil-i mezbûr Abdullah Ağa ismine kayd ile sûret i‘tâ buyrulmak iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 24 Ra sene 1237