İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 203 Hüküm no: 176 Orijinal metin no: [34b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkāl Yako v. Mosi ile Zeliha Hatun bt. Ömer’in bakkāl dükkanı nizaında sulh oldukları Mecmû‘u dört kepenkli Hasköy’de bir bâb bakkāl Ma‘rûz[-ı dâ‘î-i devlet-i aliyyeleridir ki] Zîr-i nezâret-i dâ‘iyânemde olan evkāfdan Çolak el-Hâc İbrahim Efendi nâm sâhibü’l-hayrın evkāfı müsakkafâtından mahrûse-i Galata’ya muzâfe Ortaköy’de ve Dereboyu’nda vâki‘ gözlükçü odaları demekle meşhûr ma‘lûmü’l-hudûd bir bâb Yahûdhâne ve tahtında kâin bir bâb bakkāl ve bir bâb derzi dükkânlarına bi’l-icâreteyn mutasarrıfe olan Zeliha Hatun bt. el-Hâc Ömer b. Abdullah’ın oğlu ve tarafından husûs-ı âtîde vekîli olduğu Hüseyin Ağa b. Derviş Mehmed ve Haseki Mehmed Tahir Ağa b. Ömer nâm kimesneler şehâdetleriyle mahzar-ı hasm-ı câhidde ber-nehc-i şer‘î sâbit ve sübût-ı vekâletine hükm-i şer‘î lâhık olan derûn-ı arzuhâlde mezkûrü’l-ism hâssa hasekilerinden Mehmed Emin Ağa b. el-Hâc Hüseyin meclis-i şer‘î münîrde bakkāllar pazarbaşısı Süleyman Ağa ve Bölükbaşı Abdi nâm kimesneler ile esnâf-ı mezkûre nizâm ustaları mazbûtü’l-esâmî zimmîler hâzır oldukları hâlde hâmiş-i arzuhâlde mastûr derkenârda tahrîr olunduğu üzere Ortaköy’de Halil Ağa ismiyle başmuhâsebede mukayyed zikr olunan bakkāl dükkânı derûnunda mevcûde beyne’l-esnâf gedik tâ‘bir olunur [35a] âlât-ı lâzıme-i ma‘lûmeye bâ-hüccet-i şer‘iyye şirâen mâlik ve dükkân-ı merkūmda müstecir olan sâhib-i arzuhâl Bakkāl Yako v. Mosi nâm Yahûdi muvâcehesinde zikr olunan Yahûdhâne tahtında vâki‘ iki kepenk bakkāl ve iki kepenk derzi dükkânları vâlidem müvekkile-i mezbûrenin bâ-re’y-i mütevellî tasarrufunda ve ancak mezkûr iki kepenkli bakkāl dükkânında şehriye beşer guruş kirâ ile mesfûr Bakkāl Yako Yahûdi müstecir ve gediğine mâlik iken bir müddetden berü mesfûr Bakkāl Yako Yahûdi sâlifü’z-zikr iki kepenkli derzi dükkânı ile Yahûdhâne-i mezkûrenin bir kapı mahallini dükkân-ı mezkûra ilâve ve bakkāl dükkânını dört kepenkli olarak fuzûlî isti‘mâl edüp müvekkile-i mezbûre bu esnâda Yahûdhâne-i merkūmeyi ta‘mîre mübâşeret eylediği zikr olunan derzi dükkânı ile kapı mahallini Yahûdhâne-i mezkûreye ilâve murâdıyla taleb ettikte Yahûdi-i mesfûr teslîme mümâna‘at etmekle suâl olunup sâlifü’z-zikr iki kepenk derzi dükkânı ile kapı mahallini teslîme mümâna‘at etmemek üzere tenbîh olunmak bi’l-vekâle matlûbumdur mersûmdan da‘vâya tasaddî eylediğimde bi’l-cümle esnâf-ı merkūmûn tavassutuyla beynimiz tevfîk ve ıslâh olunup ben zikr olunan iki kepenkli bakkāl dükkânı ve mukaddemâ ilâve olunan iki kepenkli derzi dükkânı ve kapı mahallini mecmû‘u dört kepenkli bir bâb bakkāl dükkânı olarak işbu târih-i i‘lâmdan beher şehr onar guruşa mesfûr Bakkāl Yako Yahûdi’ye bi’l-vekâle îcâr ve teslîm ol dahi istîcâr ve kabz ve kabûl ve şehriye on guruş ücret-i merkūmeyi beher şehr bilâ-cevr vâlidem müvekkile-i mezbûre içün bana edâya ta‘ahhüd etmeğin fîmâ ba‘d ben bi’l-cümle zikr olunan dükkân içün Yahûdi-i mesfûra ol dahi Yahûdhâne-i merkūmeyi bi’l-vekâle ta‘mîr ve termîme kat‘a dahl ve ta‘arruz etmeyüp Yahûdhâne-i mezkûrede kadîmden yazıcı olmağla yine kemâ-fi’s-sâbık yazıcılık hizmetini dahi edâya ta‘ahhüd edüp ba‘de’l-yevm husûs-ı mezkûra müte‘allika tarafeynden her birimiz âhar ile kat‘â da‘vâ ve nizâ‘ ve husûmetimiz kalmadı deyü bi’t-tav‘ ve’r-rızâ vekâleten ve asâleten ikrâr ve tasdîkleri tescîl ve İstanbul Mahkemesi’nden huzûr [-ı âlîlerine i‘lâm olundu.] Fî 15 Ra sene 1237