İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 204 Hüküm no: 177 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryam ve Menteş bintey Avakim’in tasarruflarında olan un değirmeni için ferman talebi Uncu değirmeni içün bir kıt‘a sûret i‘tâsı Ma‘rûz[-ı dâ‘î-i devlet-i aliyyeleridir ki] Âsitâne-i aliyyede vâki‘ habbâz tâifesinden kendi nefsinden asıl ve zikri âtî uncu değirmeni gedik âlât-ı lâzımesinde şerîkleri olan Maryam ve Menteş bintey Avakim Nasrâniyeler ile Aleksan v. Haçok ve Kürkçü Agob v. Ohannes nâm zimmîler taraflarından vekîl-i sâbitü’l-vekâleleri diğer Aleksan v. Artin nâm zimmî İstanbul mahkemesinde meclis-i şer‘-i münîrde habbâzân Kethüdâsı Mehmed Efendi b. Ali ve uncular kethüdâsı diğer Mehmed Efendi b. el-Hâc Hüseyin nâm kimesneler ile nizâm ustalarından Filibos ve Agob ve Manas ve Ağyar nâm zimmîler ve sâirleri hâzır oldukları hâlde mahmiye-i İstanbul’da Samatyakapısı hâricinde Terlemez Değirmeni demekle arîf dört horoslu ma‘lûmü’l-hudûd bir bâb uncu değirmeni derûnunda mevcûde on altı re’s bârgir i‘tibâr olunan beyne’l-esnâf gedik tâ‘bir olunur şürût-ı nizâmımızda dâhil uncu âlât-ı lâzıme-i ma‘lûmesi benimle müvekkilerim mesfûrûnun iştirâken yedimizde mâlımız ve mülkümüz ve yine zikr olunan Samatyakapısı dâhilinde Hâce Kadın fırını demekle ma‘rûf bir bâb habbâz fırınına merbût altı horoslu kezâlik ma‘lûmü’l-hudûd bir bâb habbâz değirmeni derûnunda mevcûde yirmi dört re’s bârgir i‘tibâr olunan kezâlik beyne’l-esnâf gedik tâ‘bir olunur kezâlik şürût-ı nizâmımızda dâhil habbâz âlât-ı lâzıme-i ma‘lûmesi dahi yine benimle müvekkillerim mesfûrûnun yedimizde iştirâken mâlımız ve mülkümüz olup bu makūle değirmen gediklerinde mâliklerine lüzûmu olduğu sûretde bir değirmenden âhar değirmene horos nakli habbâzân ve uncu esnâfımızın şürût-ı nizâmımızdan olmağla sâlifü’l-beyân Terlemez Değirmeninin dört horoslu uncu gediği âlâtından dört re’s bârgir i‘tibâriyle bir horosu değirmen-i mezkûrdan ref‘le zikr olunan altı horoslu mârrü’l-beyân Hâce Kadın fırınına merbût habbâz değirmenine nakl ve ol vechile yedimize sûret i‘tâ buyrulmak bâbında istid‘â-yı inâyet eylediğimiz i‘lâm olunmak benim ve müvekkilûn-ı mesfûrûnun matlubum[uz]dur deyü asâleten ve vekâleten takrîr ve istid‘â-yı inâyet ettikte asıl ve vekîl-i mersûmun takrîr-i meşrûhu bi’l-cümle habbâz ve uncu esnâfının şürût-ı nizâmlarından idüğini hâzirûn-ı merkūmûn dahi ihbâr etmeleriyle mesfûr Aleksan zimmînin istid‘âsına müsâ‘adesine erzân buyrulup vech-i meşrûh üzere zikr olunan Terlemez Değirmeninden bir horos uncu gediği ref‘ ve sâlifü’z-zikr Hâce Kadın fırınına merbût altı horos değirmenine nakl ve ol vechile mâlikleri mesfûrûnun yedlerine Hâce Kadın fırınına merbût değirmen gediği içün yedi horos olduğunu nâtık bir kıt‘a ve mezkûr terlemez değirmeni derûnunda bâkī üç horos uncu değirmeni gediği içün diğer bir kıt‘a sûret i‘tâ buyrulmak bâbında fermân-ı âlîleri sudûru iktizâ eylediği mahkeme-i merkūmeden huzûr [-ı âlîlerine i‘lâm olundu.] Fî 24 S sene 1237