İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 207 Hüküm no: 179 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkāl Nikola v. Yuvan’ın kürek cezasının kaldırılması Bakkāl Nikola zimmînin kürekden ıtlâkı Ma‘rûz[-ı dâ‘î-i devlet-i aliyyeleridir ki] Âsitâne-i aliyyede kâin bakkāl esnâfının pazarbaşıları Süleyman Ağa ve kâtibi Ahmed Efendi ve Bölükbaşısı Abdi ve esnâf-ı merkūme ustabaşıları Çakıroğlu Yorgi ve kabz-ı mâl Döğenci Yuvan ve Lazari ve Mihal ve Sava ve Kara Yuvan nâm zimmîler ve sâirleri İstanbul mahkemesinde meclis-i şer‘-i enverde Balkapanı Nâzırı es-Seyyid el-Hâc Ahmed Ağa ve tüccârdan es-Seyyid el-Hâc Hasan Ağa ve el-Hâc Mustafa Ağa ve el-Hâc İsmail Ağa ve sâirleri hâzır oldukları hâlde vilâyet-i Anadolu’da Edremisun kasabası re‘âyâsından olup mukaddemâ Âsitâne-i aliyyede Salmatomruk’da bakkāl iken müflis olan Nikola v. Yuvan nâm zimmî bundan akdem tüccâra olan düyûnunu bi’t-terâzî guremâ tarîkiyle ashâbına edâ ettikte esnâflıkdan ihrâc olunduktan sonra ashâb-ı düyûnuna ber-vech-i meşrûh edâ eylediği mebâliğ-i ma‘lûmeyi verdiği mahallerden geri almak zu‘muyla tüccâr ve esnâfı ta‘cîz ve tecrîm dâ‘iyesiyle rencîde eylediğine binâen müstahakk-ı tedîb olmağla bi’l-iltimâs bâ-i‘lâm-ı şer‘î ve bâ-fermân-ı âlî bir müddetden berü küreğe vaz‘ olunmuşdu el-hâletü hâzihî mesfûr Nikola zimmî fîmâ ba‘d kendi hâlinde olup kimesneye te‘addî ve rencîde etmemek üzere bize ta‘ahhüd edüp ıslâh-ı nefs ile teeddüb etmekle biz dahi mesfûrun bundan böyle kimesneyi ta‘cîz etmeyüp kendi kesbiyle meşgūl olacağına her birimiz müte‘ahhid olduğumuzda tüccâr-ı merkūmûn dahi ta‘ahhüdümüzü kabûl etmeleriyle mesfûr Nikola zimmînin akd ve ıtlâkıyla sebîli tahliye buyrulmak bâbında istid‘â-yı inâyet eylediğimiz i‘lâm olunmak matlûbumuzdur dediklerini tüccâr-ı hâzirûn-ı mezbûrûn dahi tasdîk ve kabûl etmeleriyle ol vechile istid‘âlarına müsâ‘ade-i seniyyeleri erzânî buyrulup mesfûr Nikola zimmînin afv ve ıtlâkıyla sebîli tahliye buyrulmak bâbında fermân-ı âlîleri sudûru re’y-i sâmîlerine menût idüğü mahkeme-i mezbûreden huzûr [-ı âlîlerine i‘lâm olundu.] Fî 27 Ra sene 1237