İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 208 Hüküm no: 180 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vânizâde Seyyid Süleyman Ağa vakfının, vakfiyesinin Anadolu muhâsebesi kalemine kaydedilmesi Vakfiye [içün] emr-i âlî istid‘âsı Ma‘rûz[-ı dâ‘î-i devlet-i aliyyeleridir ki] Vilâyet-i Anadolu’da vâki‘ medîne-i Edremid ahâlîsinden sâhib-i arzuhâl Vânizâde es-Seyyid el-Hâc Süleyman Ağa nâm sâhibü’l-hayrın medîne-i merkūmede mâlından binâ ve ihyâ eylediği mekteb-i şerîf ve hayrât-ı sâiresi evkāfının bin iki yüz otuz altı senesi Cumâdelâhiresinin yirmi beşinci günü târihiyle müverraha ve ol târihde medîne-i mezbûrede nâibü’ş-şer‘i’ş-şerîf olan İmâmzâde es-Seyyid Mehmed Şâkir Efendi’nin imzâ ve hatmini hâviye derûn-ı arzuhâlde mezkûre derdest olan bir kıt‘a vakfiyesine nazar ve mütâla‘a olundukta vakfiye-i merkūmenin sebk-i ve serdi kā‘ide-i fenn-i sakka muvâfık ve hâvî olduğu şürût ve kuyûduyla bi’l-cümle mazmûnu şer‘-i şerîfe mutâbık olup ol vechile vakfiye-i merkūme ihticâca sâliha ve kayda lâyıka olmağın istid‘â olunduğu üzere vakfiye-i merkūme bi-ibâretihâ Anadolu muhâsebesi kalemine kayd ve vâkıf-ı mûmâ-ileyhin yedinde ibkā buyrulmak bâbında fermân-ı âlîleri sudûru iktizâ eylediği imtisâlen li’l-emri’l-âlî İstanbul Mahkemesi’nden huzûr [-ı âlîlerine i‘lâm olundu.] Fî 26 Ra sene 1237