İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 213 Hüküm no: 186 Orijinal metin no: [36b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Halîfe b. Mustafa’ya zâyi‘ nedeniyle yeniden müezzinlik beratı verilmesi Vakfiye emr-i âlî istid‘âsı Ma‘rûz[-ı dâ‘î-i devlet-i aliyyeleridir ki] Zîr-i nezâret-i dâ‘iyânemde olan evkāfdan İstanbul’da Âşıkpaşa nezdinde Ferhad Mescidinde yevmî altı akçe vazîfe ile müezzinlik cihetine bâ-berât-ı âlîşân mutasarrıf olan sâhib-i arzuhâl Ahmed Halîfe b. Mustafa yedinde olan berâtını zâyi‘ etmekle berât-ı şerîf-i âlîşân sadaka ve ihsân buyrulmak bâbında istid‘â-yı inâyet eylediği arzuhâli mefhûmundan ve müezzinlik-i merkūm vazîfe-i mersûmesiyle el-yevm Ahmed Halîfe b. Mustafa üzerinde olduğu derkenârda müstebân oldukdan sonra sâhib-i arzuhâl merkūm Ahmed Halîfe müezzinlik-i merkūma el-yevm mutasarrıf olup edâ-yı hizmet eylediği İmâm el-Hâc Mehmed Emin Efendi b. Mehmed ve Ali Efendi b. Abdurrahman nâm mevsûku’l-kelîm kimesnelerin bi’l-muvâcehe an-tarîkı’ş-şehâde haberleriyle zâhir ve mütehakkık olmağın mûcebiyle merkūm Ahmed Halîfenin istid‘âsına müsâ‘ade-i seniyyeleri erzân buyrulup zâyi‘den berât-ı âlîşân sadaka ve ihsân buyrulmak bâbında fermân-ı âlîleri sudûru iktizâ eylediği imtisâlen li’l-emri’l-âlî İstanbul Mahkemesi’nden huzûr [-ı âlîlerine i‘lâm olundu.] Fî 29 Ra sene 1237