İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 213 Hüküm no: 187 Orijinal metin no: [36b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakut bt. Mikasar’ın, ipekçi dükkânı gediğini Artin v. Kegork ve Bedros v. Marat’a sattığı 420 guruşa iştirâken oda bey‘i Ma‘rûz[-ı dâ‘î-i devlet-i aliyyeleridir ki] Mahrûse-i Galata’ya muzâfe kasaba-i Beşiktaş’a tâbi‘ Ortaköy’de mütemekkine Yakut bt. Mikasar nâm Nasrâniye tarafından husûs-ı âtîde ikrâra vekîl olduğu şahsını bilir Agob v. Abraham ve Tatus v. Kirkor nâm zimmîler şehâdetleriyle sâbit olan Toros v. Seterak nâm zimmî meclis-i şer‘-i münîrde kazzâzlar kethüdâsı Abdüllatif Ağa ve yiğitbaşıları Mehmed hâzır oldukları hâlde bâ‘iseyi’l-i‘lâm Artin v. Kegork ve Bedros v. Marat zimmîler muvâcehelerinde bi’l-vekâle takrîr-i kelâm edüp müvekkilem mersûme Yakut Nasrâniye İstanbul’da Çarşı-yı Kebîr’de Aynalı han karşısında köşede vâki‘ tülbentçi ve derzi dükkânları ile mahdûd ve bir kepenkli bir bâb kazzâz dükkânı derûnunda mevcûde bir gedik i‘tibâriyle başmuhâsebe kaleminde mukayyed beyne’l-hiref gedik tâ‘bir olunur akd-i âti’z-zikrin sudûruna değin bir kıt‘a sûret mantûkunca yedimde mâlım ve mülküm olan âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan bi-safkatin vâhidetin mersûmân Artin ve Bedros zimmîlere nısfiyet üzere iştirâken dört bin iki yüz guruş semen-i medfû‘ ve makbûza bey‘ ve temlîk ve teslîm eylediğimde onlar dahi ber-vech-i muharrer iştirâken iştirâ ve temellük ve tesellüm ve kabz ve kabûl etmeleriyle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt etmemizle fîmâ ba‘d âlât-ı lâzıme-i mezkûre mersûmân Artin ve Bedros zimmîlerin nısfiyet üzere iştirâken mülk-i müşterâları olup benim kat‘â alâka ve medhalim kalmamışdır dedi deyü ba‘de’l-ikrâr ve tasdîk âlât-ı lâzıme-i mezkûrenin kaleminde müvekkile-i mersûme Yakut Nasrâniye üzerine olan kayd-ı atîki ref‘ ve terkīn-birle mesfûrân Artin ve Bedros zimmîler isimlerine kayd ve yedlerine müceddeden bir kıt‘a sûret i‘tâsı bâbında istid‘â-yı inâyet etmeleriyle istid‘âları üzere gedik-i mezkûrun müvekkile-i mersûme Yakut [37a] Nasrâniye üzerinde olan kaydı ref‘ ve müşteriyân-ı mesfûrân Artin ve Bedros zimmîler isimlerine kayd ile sûret i‘tâ buyrulmak iktizâ eylediği İstanbul Mahkemesi’nden huzûr[-ı âlîlerine i‘lâm olundu.] Fî-gurre-i R sene 1237