İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 214 Hüküm no: 188 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avram Savil v. Lazari’nin, Mehmed Ervay b. Salih’e olan borcunu ödemesi gerektiği Fes semeninden 22.634 [guruş] hüküm Ma‘rûz[-ı dâ‘î-i devlet-i aliyyeleridir ki] Âsitâne’de vâki‘ fesci esnâfından ashâb-ı arzuhâl el-Hâc Mehmed Ervay b. Salih nâm kimesne yine esnâf-ı mezkûreden Salih b. Salih ve Ali b. Mehmed ve el-Hâc Ömer b. Cafer ve el-Hâc Salih b. Yunus ve Süleyman Zekûk b. el-Hâc Kasım ve Ramazan b. Molla Abdullah ve Mahmud b. Ali nâm kimesneler hâzır oldukları hâlde Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘-i enverde Purusa tüccârından derûn-ı arzuhâlde mezkûrü’l-ism Kehrubâcı Avram Savil v. Lazari nâm Yahûd-i müste’men muvâcehesinde Purusya tercümânı Matyo hâzır olduğu hâlde benim mesfûr Avram Savil nâm Yahûd-i müste’mene mâlımdan bey‘ ve teslîm eylediğim fesci emti‘ası semeninden beş bin dört yüz kırk guruş ve hâzır-ı mezbûr Salih’in kezâlik bey‘ ve teslîm eylediği fesci emti‘ası semeninden beş bin beş yüz guruş ve hâzır-ı mezbûr Ali’nin kezâlik bey‘ ve teslîm eylediği fesci emti‘ası semeninden dört bin üç yüz guruş ve hâzır-ı mezbûr el-Hâc Ömer’in kezâlik bey‘ ve teslîm eylediği fesci emti‘ası semeninden sekiz bin beş yüz guruş ve hâzır-ı mezbûr el-Hâc Salih’in kezâlik bey‘ ve teslîm eylediği fesci emti‘ası semeninden bin yüz yirmi guruş ve hâzır-ı mezbûr Süleyman Zekûk’un kezâlik bey‘ ve teslîm eylediği fesci emti‘ası semeninden üç bin dört yüz dört guruş ve hâzır-ı mezbûr Ramazan’ın kezâlik bey‘ ve teslîm eylediği fesci emti‘ası semeninden bin altı yüz yetmiş guruş ve hâzır-ı mezbûr Mahmud’un kezâlik bey‘ ve teslîm eylediği fesci emti‘ası semeninden iki bin yedi yüz guruş ki ol vechile benim ve hâzirûn-ı mezbûrûnun mersûm Avram Savil nâm Yahûd-i müste’men zimmetinde min-haysü’l-mecmû‘ yirmi iki bin altı yüz otuz dört guruş alacak hakkımız olmağla meblağ-ı mecmû‘-ı mezkûru ben ve hâzirûn-ı merkūmûndan her birimizin Yahûd-i müste’men-i mersûmdan taleb ederiz deyü hâzirûn-ı merkūmûnun tasdîkleriyle eylediği da‘vâsını mersûm Avram Savil Yahûd-i müste’men bi-tamâmihâ tâyi‘an ve kat‘iyyen ikrâr u i‘tirâf etmeğin ikrârı mûcebince meblağ-ı mecmû‘-ı merkūmu müdde‘î-i mezbûr ile müdde‘ûn-ı hâzirûn-ı merkūmûndan her birine ber-vech-i muharrer edâsıyla mersûm Avram Savil müste’men ilzâm olunduğu İstanbul Mahkemesi’nden huzûr [-ı âlîlerine i‘lâm olundu.] Fî 16 Za sene 1236