İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 215 Hüküm no: 189 Orijinal metin no: [37a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice Hatun bt. Hüseyin’in, damadı Seyyid Mustafa Yazıcı ile sulh oldukları 150 guruş sulh Ma‘rûz[-ı dâ‘î-i devlet-i aliyyeleridir ki] Mahrûse-i Galata’ya muzâfe kasaba-i Beşiktaş’a tâbi‘ Kuruçeşme karyesinde sâkine zâtı mu‘arrefe Hadice Hatun bt. Hüseyin İstanbul mahkemesinde meclis-i şer‘-i münîrde ve hâlâ dâmâdı es-Seyyid Mustafa Yazıcı b. el-Hâc Mehmed muvâcehesinde işbu târih-i i‘lâm senesi Saferi’l-hayrının üçüncü günü târihiyle müverrah İstanbul Bâb Mahkemesi nâibi olan müderrisîn-i kirâm-ı zevi’l-ihtirâmdan Mustafa Nazif Efendi hatmiyle mahtûm bir kıt‘a i‘lâm-ı şer‘î mûcebince mâlımdan dâmâdım mezbûrun menzilinde ve yedinde emânet olup ikrârı mûcebince bana teslîme tenbîh olunan eşyâ-i ma‘lûmemi bana hîn-i teslîminde eşyâ-i mezkûremden mecmû‘u beş yüz kırk guruş kıymetli üç penbezâr gömlek ve iki işleme cedîd havlu ve altı işleme aş makremesi ve dört uçkur ve dört Hatâyî bohça ve iki yorgan çarşafını bana teslîm etmeyüp fuzûlî alıkomağla eşyâ-i muharrere-i mezkûre mevcûde ise a‘yânını müstehleke ise ba‘de’s-sübût bi-tarîkı’d-damân kıymet-i şer‘iyyelerini taleb ederim deyü da‘vâ eylediğimde ol dahi ba‘de’l-inkâr bâ-vesâtet-i muslihîn da‘vâ-yı mezkûremden dâmâdım mezbûr es-Seyyid Mustafa Yazıcı ile yüz elli guruş bedel-i makbûz üzerine ba‘de akdi’l-musâlaha ve’l-kabûl ancak husûs-ı mezkûra müte‘allika âmme-i de‘âvî ve mutâlebât ve kâffe-i eymân ve muhâsemâtdan ibrâ-i âmm-ı kâtı‘ü’n-nizâ‘ ve râfi‘u’l-hısâm ile tarafeynden her birimiz âharın zimmetini kabûlü hâvî ibrâ ve iskāt ve husûs-ı mezkûra müte‘allika kat‘-ı nizâ‘ eyledik deyü ikrâr ve tasdîkleri tescîl ve huzûr [-ı âlîlerine i‘lâm olundu.] Fî 24 Ra sene 1237