İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 216 Hüküm no: 190 Orijinal metin no: [37a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Silistre nâzırı Hacı Halil Ağa vakfının mütevelliyesi Şerîfe Hadice Hanım’ın, Hacı Derviş’i vekil tayin ettiği Hınta Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlîlerine imtisâlen işbu arzuhâl ve derkenârlara nazar olundukda Silistre nâzırı esbak müteveffâ el-Hâc Halil Ağa’nın medîne-i Yerköy’de kâin evkāfı müsakkafâtından derkenâr olunan vakfiyesinde mezkûr Silistre ve Hırsova ve Karasu kazalarında ve Rasut karyesinde olan müsakkafâtı kirâlarını on bir sene müddet fuzûlî zabt edenlerden da‘vâ ve vakf-ı merkūm içün lâzım gelen ecr-i misillerini mahallerinde cânib-i vakfa almak üzere vakf-ı merkūm mütevelliyesi evlâd-ı vakıfdan sâhibe-i arzuhâl Şerîfe Hadice Hanım tarafından bi’t-tevliye vekîl nasbeylediği Hacı Derviş ma‘rifetiyle tahsîl olunmak bâbında vâlisine hitâben bâ-fermân-ı âlîşân sudûrunu istid‘â eder husûs-ı mezkûr derkenârlara nazaran rüsûmât-ı mîriyyeye ta‘alluk etmeyüp ancak müsakkafât icâresi mutâlebesinden ibâret olduğu muhât-ı ilm-i âlem ârâları buyruldukda mahallinde şer‘le rü’yet olunmak bâbında fermân-ı âlîleri sudûru muktezâ-yı maslahat olup ancak istid‘â olunduğu vechile vâlisine hitâben ilâvesi re’y-i sâmîlerine menût idüğü İstanbul Mahkemesi’nden huzûr [-ı âlîlerine i‘lâm olundu.] Fî 11 R sene 1237