İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 216 Hüküm no: 191 Orijinal metin no: [37a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Seyyid Mehmed’in hâssa yoğutçubaşılığına tayini Beylik mandırasının kethüdâsı nasbı Ma‘rûz[-ı dâ‘î-i devlet-i aliyyeleridir ki] Bâb-ı âliye arzuhâl takdîm eden Âsitâne-i aliyye ve bilâd-ı selâsede vâki‘ yoğurtçu ve sütçü ve kaymakçı esnâfının kethüdâları Ahmed Ağa b. Abdullah ve Yiğitbaşı Yakub ve Kantarcılarlı Kerimoğlu Mustafa ve Zeyrekli Ali ve Süleymâniyeli Ömer Müslimîn ile re‘âyâdan Kıztaşlı Mihal ve Sofularlı Anaştaş ve Gümüşsulu Foto ve Galata bitpazarlı Filko ve Kemeraltında Aleksi ve Kızılmaslakda İstefan nâm zimmîler ve sâirleri [37b] meclis-i şer‘-i münîrde hâlâ hâssa yoğurtçubaşısı olan el-Hâc Mustafa Ağa b. Hüseyin muvâcehesinde mastekarân-ı hâssa ocağı odabaşısı Bostanî Mehmed b. Ahmed ve Küçükodabaşı Bosta[nî] es-Seyyid Osman b. es-Seyyid Mustafa ve neferâtından Ali b. Mehmed ve Şerîf b. es-Seyyid Süleyman ile Bölükbaşı vekîli Bostanî es-Seyyid Mehmed b. Seyyid Hasan hâzır oldukları hâlde işbu yedimizde olan bin iki yüz yirmi yedi senesi Muharremi’l-harâmının on yedinci günü târihiyle müverrah bir kıt‘a fermân-ı âlîşânda tasrîh olunduğu üzere hâssa yoğurtçubaşısı olanlar nefs-i nefîs-i hümâyûn ve mu‘ayyenât-ı sâire-i ma‘lûme içün mastekarân-ı hâssa ocağından küllü yevm verilen süt ve yoğurt ve kaymak ve tereyağı ve sâir ta‘ayyünâtı yoğurtçubaşı olanlar beylik mandıra mahsûlünden vefâ etmez ise dilediği mandırayı iltizâm ve hâsılâtıyla tekmîl ve idâre ve rü’yet edüp fakat rûz-ı hızırda beylik mandıralar sahraya çıkdıkda üç gün ve rûz-ı Kasımda ahıra idhâl olundukta üç gün ki ancak senede altı gün ta‘ayyünât-ı mezkûre içün iktizâ eden mikdâr-ı kifâ[ye] sütü sa‘r-ı râyici ile esnâfından mübâya‘a eylemek şürût-ı nizâmından olup lâkin yoğurtçubaşı-i mûmâ-ileyhin beylik mandıra ile ber-mûceb-i nizâm-ı kadîm taht-ı iltizâmında olan mandıra yedinde ve hâsılâtı ile ta‘ayyünât-ı mezkûreyi idâre lâzım iken yoğurtçubaşı-ı mûmâ-ileyh neferâtını mandıralarımıza irsâl edüp her birlerimizin kârhânelerimize gelen sütlerimizi esnâ-i tarîkde cebren fuzûlî ahz ve mastekarân-ı hâssa ocağına nakl ederek işbu târihe gelince bi’l-cümle esnâfımızın mâlı olarak aldığı on beş bin vakıyyeden mütecâviz sütlerimizin bahâsını kendiden taleb eylediğimizde bir akçe vermeyüp ol vechile esnâfımıza gadr-ı küllî etmekle suâl olunup hesâbımızı rü’yet edüp her birimizin mâlından aldığı sütlerin bahâsını edâ etmek üzere kendüye tenbîh olunsun dediklerinde yoğurtçubaşı-i mûmâ-ileyh es-Seyyid el-Hâc Mustafa Ağa cevâbında fi’l-hakīka beylik mandıra ile taht-ı iltizâmımda olan mandıra yedimde olup lâkin alîl ve ihtiyâr olup zikr olunan mandıraları ve yoğurtçubaşılığı idâre ve rü’yetden her vechile âciz olduğumdan idân-ı ta‘ayyünât içün esnâf-ı merkūmenin sütlerini binâen-aleyh ahz edüp ve hâlâ ben bi’t-tav‘ ve’r-rızâ hâssa yoğutçubaşılığından isti‘fâ ve keff-i yed etmemle hâssa yoğurtçubaşılığını her vechile idâre ve rü’yete kādir idüğü gerek ocaklısı ve gerek esnâf-ı merkūmenin haberleriyle zâhir olan hâzır-ı mezbûr bölükbaşı vekîli Bostanî es-Seyyid Mehmed yoğurtçu ta‘yîn ve bu alîl ve ihtiyâr kullarına sâbıkda olduğu misillü bir mikdâr maaş ihsân buyrulmak irâde buyrulursa esnâf-ı merkūme mâllarından aldığım sütlerin hesâbını rü’yet edüp zimmetimde zuhûr eden deynimi dahi mandıralarda mevcûd emvâl-i mîrîyeden mâ‘adâ kendi mâlımdan havâle ve vefâ etmez ise âhar mâlımdan edâ ederim deyü eylediği takrîrini bi’l-cümle esnâf ve hâzirûn-ı merkūmûn tasdîk ve mezbûr bölükbaşı vekîli Bostanî es-Seyyid Mehmed dahi nizâm-ı mezkûr üzere idâre ve esnâfa rencîde etmemek üzere ta‘ahhüd edüp her birileri ber-vech-i meşrûh hâzır-ı mezbûr bölükbaşı vekîli Bostanî es-Seyyid Mehmed’in hâssa yoğurtçubaşısı nasb buyrulması bâbında iltimâs ve istirhâm eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 11 R sene 1237