İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 217 Hüküm no: 192 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Hıdır v. Mikail’in, menzilini takasen Sanduh bt. Agob’a kiraya verdiği 2.500 guruşa takāsen menzil îcâr Mukābele şüd Ma‘rûz[-ı dâ‘î-i devlet-i aliyyeleridir ki] Arzuhâl eden şahsı mu‘arrefe Sanduh bt. Agob Nasrâniye bi’l-ma‘iyye rü’yete memûr nezâret-i hazret-i Şeyhülislâm -sellemehü’s-selâmî-de âsûde evkāf müfettişi müderrisîn-i kirâm-ı zevi’l-ihtirâmdan Kütahyevî Ömer Efendizâde Fazîletlü es-Seyyid Mehmed Ârif Efendi tarafından mürsel Kâtib es-Seyyid Mehmed Halim Efendi hâzır olduğu hâlde du‘âhâne-i dâ‘îlerinde ma‘kūd meclis-i şer‘-i münîrde zikri âtî menzile bâ-temessük-ı mütevellî bi’l-icâreteyn mutasarrıf olmağla vaz‘-ı yedi mütehakkık olan arzuhâlde mastûrü’l-ism Tütüncü Hıdır v. Mikail zimmî muvâcehesinde nezâret-i hazret-i müşârun-ileyhde mahmî evkāfdan Şeyhülislâm-ı esbak merhûm Dâmâdzâde Ebulhayr Ahmed Efendi Vakfı’nın bi’l-meşrûta mütevellîsi kibâr-ı mevâlî-i izâmdan Semahatlü Murad Efendizâde Mehmed Ârif Efendi tarafından mürsel vekîli câbî-i vakf es-Seyyid Ahmed Efendi b. es-Seyyid Ömer hâzır olduğu hâlde mersûm Hıdır zimmînin vâzı‘u’l-yed olduğu vakf-ı mezkûrdan Havâss-ı Refî‘a kazâsına muzâfe Hasköy’de Yenimahallede kapıcıbağı denilen mahalde vâki‘ ma‘lûmü’l-hudûd bir bâb menzil mukaddemâ bâ-temessük-ı mütevellî bi’l-icâreteyn taht-ı tasarrufumda iken ben menzil-i mezkûru bin iki yüz otuz üç senesi Şevvâli’l-mükerreminin beşinci günü zimmî-i mersûma karzdan ve tütün semeninden deynim olan on bin beş yüz elli sekiz guruş mukābelesinde vefâen fâriğa olup ba‘dehû zimmî-i mersûmun yedinden ve mâlından dokuz yüz kırk iki guruş dahi iktirâz ve kabz etmemle menzil-i mezkûru iki bin beş yüz guruş bedel mukāvelesiyle bin iki yüz otuz dört sene[si] Muharremi’l-harâmı hılâlinde mersûm Hıdır zimmîye bâ-re’y-i mütevellî kat‘iyyen ferağ ve tefvîz eylediğimde ol dahi tefevvüz ve kabûl ve bedel-i mezkûru bi’t-terâzî deyn-i mezkûrum olan iki bin beş yüz guruşa takāsen istîfa etmiş olmamla ol vechile menzil-i mezkûrda benim kat‘an alâkam kalmayup mersûm Hıdır zimmînin kat‘iyyen dâhil-i havza-i tasarrufu olup mersûm Hıdır zimmî menzil-i mezkûru ba‘de’t-tahliye ve’t-takābuz işbu târih-i i‘lâmdan beher şehr on beş guruş kirâ kavliyle aded-i şuhûr beyân olunmaksızın bana îcâr ve teslîm ben dahi istîcâr ve tesellüm ve kabûl eyledim dediğini mersûm Hıdır zimmî ile mütevellî vekîli hâzır-ı merkūmdan her biri tasdîk eylediği İstanbul Mahkemesi’nden huzûr [-ı âlîlerine i‘lâm olundu.] Fî 14 M sene 1237