İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 218 Hüküm no: 193 Orijinal metin no: [37b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beniçe ve Altako’nun, malik oldukları tütün dükkanı gediğini Seyyid Mehmed İzzet Ağa’ya sattıkları Tütüncü gediği Ma‘rûz[-ı dâ‘î-i devlet-i aliyyeleridir ki] Bâ‘isü’l-i‘lâm tütüncü esnâfından es-Seyyid Mehmed İzzet Ağa b. es-Seyyid Ali meclis-i şer‘-i münîrde esnâf-ı merkūme kethüdâsı vekîli es-Seyyid Mustafa Ağa ve Yiğitbaşı es-Seyyid Abdullah ve esnâfından Ömer Ağa b. Mehmed ve Hüseyin Ağa b. el-Hâc Ali ve Ahmed Ağa b. Osman hâzır oldukları hâlde takrîr-i kelâm edüp İstanbul hısnı ebvâbından Balıkpazarı kapısı hâricinde duhân gümrüğü ittisâlinde Bağcılar sokağı nâm mahalde vâki‘ maden kaleminde el-yevm Atanaş zimmî üzerine mukayyed ve şürût-ı nizâmımızda dâhil şehriye sekiz guruş kirâ-yı kadîmeli ma‘lûmü’l-hudûd bir bâb tütüncü mağazası derûnunda mevcûde beyne’l-esnâf gedik tâ‘bir olunan âlât-ı lâzıme-i ma‘lûme mersûm Atanaş zimmîden bâ-hücec-i şer‘iyye bey‘ u şirâ olunarak tedâvül-i eydî ile mâlike olan Beniçe ve Altako Nasrâniyelerden yedinden bâ-hüccet-i şer‘iyye [38a] âlât-ı mezkûreyi semen-i ma‘lûm ve makbûza iştirâ ve kabz etmemle hâlâ yedimde mâlım ve mülküm olup lâkin zikr olunan tütüncü gediği âlât-ı lâzımesi maden kaleminde el-yevm mersûm Atanaş zimmî ismine mukayyed olmağla mersûm Atanaş zimmî ismine olan kayd-ı atîki ref‘ ve terkīn-birle ve ismime tashîh ile yedime sûret i‘tâ buyrulmak bâbında istid‘â-yı inâyet eylediğim i‘lâm olunmak matlûbumdur dedikde merkūm es-Seyyid Mehmed İzzet Ağa’nın takrîr-i meşrûhu vâkı‘a mutâbık ve şürût-ı nizâmlarına muvâfık idüğünü esnâf-ı merkūmûndan meclis-i şer‘de ihbâr etmeleriyle gedik-i mezkûrun mersûm Atanaş zimmî ismine olan maden kaleminden ref‘ ve terkīn ve mezbûr es-Seyyid Mehmed İzzet Ağa ismine tasrîhan kayd ile müceddeden yedine bir kıt‘a sûret i‘tâ olunması bâbında fermân-ı âlîleri sudûru iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 10 R sene 1237