İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 233 Hüküm no: 210 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Şâkir Efendi’nin, Ubeyde Hatun bt. Abdürrezzak’a olan borcunu ödemesi gerektiği 2.200 guruş hüküm Ma‘rûz[-ı dâ‘î-i devlet-i aliyyeleridir ki] Mübârek rikāb-ı müstetâb-ı hazret-i cihânbânîye arzuhâl takdîm eden zâtı mu‘arrefe Ubeyde Hatun bt. Abdürrezzak evvelâ bi’d-defa‘ât Çarşamba günleri arz odasında hazret-i huzûr-ı Sadâret-penâhîde ve ba‘de[hû] du‘âhânemizde ma‘kūd meclis-i şer‘-i enverde hâlâ dâmâdı derûn-ı arzuhâlde mastûrü’l-ism Cerrâh Mehmed Şâkir Efendi b. Mehmed nâm kimesne muvâcehesinde dâmâdım merkūm Mehmed Şâkir Efendi bin iki yüz otuz dört senesi hılâlinde mâlımdan ve yedimde bir def‘a altı yüz guruş ve bir def‘a yedi yüz guruş ki cem‘an iktirâz ve kabz ve istihlâk eylediği bin üç yüz guruş zimmetinde alacak hakkım olmağla meblağ-ı mecmû‘-ı merkūm ile âhara rehn etmek içün mâlımdan ve yedimden isti‘âre ve kabz eylediği iki bin beş yüz guruş kıymetli bir elmas tepeliği fuzûlî âhara bey‘le istihlâk etmekle kıymet-i mezkûresini damânen yine dükkânında isti‘mâl içün mâlımdan ve yedimden isti‘âre ve kabz edüp hâlâ yedim[n]de mevcûd olan iki yün şilte ve beş koltuk yastığı ve bir tombak tepsi ve bir şal kahve pûşîdesi ve bir havan ve bir leğen ve bir çubuğu dahi bi-aynihâ dâmâdım mezbûr Mehmed Şâkir Efendi’den taleb ederim deyü da‘vâ ettikte mezbûr Mehmed Şâkir Efendi dahi cevâbında meblağ-ı mecmû‘-ı mezkûr bin üç yüz guruş zimmetinde hâlâ deyni ve eşyâ-i mezkûre yedinde mevcûd olup müdde‘iye-i mezbûrenin mâlından ve yedinden isti‘âre eylediğini ve zikr olunan tepeliği ber-vech-i muharrer müdde‘iye-i mezbûrenin mâlından ve yedinden isti‘âre ve kabz ve fuzûlî ancak kıymet-i misliyesi olan dokuz yüz guruş semen-i makbûza âhara beyle istihlâk eylediğini ikrâr edüp zikr olunan tepelikde müdde‘iye-i mezbûrenin ziyâde kıymet müdde‘âsını inkârından gayrı kayın vâlidem müdde‘iye-i mezbûre Âbide Hanım’ın bi-şartü’r-rücû‘ emriyle bin iki yüz otuz iki senesi şehr-i Rebî‘ülevveli gurresinden iki yüz otuz altı senesi Şevvâli’l-mükerremi gurresine gelince mâlımdan me’kûlât ve meşrûbât ve levâzım-ı sâiresine beher şehr seksen guruşdan elli beş ayda cem‘an masrûfum olan dört bin dört yüz guruşu ben dahi kayın vâlidem merkūme Ubeyde Hatun’dan bi’l-mürâca‘a taleb ederim deyü ba‘de’d-da‘vâ ve’l-inkâr tarafeyn âharın münker oldukları müdde‘âlarını müddet-i mehl-i şer‘î tamamında isbât edemeyip her biri âharı tahlîfe dahi tâlib olmamağla ikāme-i beyyine etmek üzere her biri beyâna ba‘de’l-havâle ikrârı mûcebince meblağ-ı mecmû‘-ı mezkûr bin üç yüz guruş ve âhara bey‘le istihlâk eylediği sâlifü’z-zikr tepeliğin ancak kıymet-i misliyesi olduğunu mu‘terif olduğu dokuz yüz guruş ki min-haysü’l-mecmû‘ iki bin iki yüz guruş ile yedinde mevcûd eşyâ-i muharrere-i mezkûreyi müdde‘iye-i mezbûre Ubeyde Hatun’a edâ ve def‘ ve teslîme merkūm Mehmed Şâkir Efendi’ye tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 15 R sene 1237