İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 234 Hüküm no: 211 Orijinal metin no: [41a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mıhçı esnafının işlenecek demir hususunda Nalbur Mehmed Said Ağa ile anlaştığı Mıhçı esnâfıyla na‘lbur esnâfının nizâ‘ı ve ta‘ahhüdleri Ma‘rûz[-ı dâ‘î-i devlet-i aliyyeleridir ki] Mahmiye-i İstanbul’da merhûm Ebu’l-feth Sultan Mehmed Hân -aleyhi’r-rahmetü ve’l-gufrân- Câmi‘-i şerîfi kurbünde kâin mıhçı esnâfının kethüdâları Mustafa Usta b. Ali ve Yiğitbaşı İsmail Usta b. Mehmed ve esnâf-ı mezkûreden Çubuğun oğlu Hüseyin ve Zaralı oğlu ve Veli Hasan oğlu Mehmed ve Râkib oğlu Salih ve Şa‘bân Beyoğlu Ali ve Koz Mehmed oğlu Osman ve Kayıkçı oğlu Mehmed ve Molla Hasan oğlu Ömer ve Kara Ali oğlu İsmail ve Yanık oğlu Mehmed Emin ve Hacı Osman oğlu Mustafa ve Arab Beşe oğlu Mustafa ve sâirleri meclis-i şer‘-i münîrde mahmiye-i mezbûrede kâin na‘lband esnâfının kethüdâları İsmail Ağa b. Mehmed ve esnâfından diğer İsmail Ağa b. Mustafa hâzır oldukları hâlde Na‘lbur Mehmed Said Ağa b. el-Hâc Mehmed muvâcehesinde esnâfımızın tasnî‘ ve i‘mâl ve mahmiye-i mezbûre ve tevâbi‘inde olan na‘lband esnâfına bey‘ eylediğimiz mıhçıların ham demirini ötedenberü nizâmımız üzere merkūm Na‘lbur Mehmed Said Ağa tüccârından has ve a‘lâ demir olarak iştirâ ve ba‘dehû kendi amelesine yardırup çubuk edüp yine has ve boşmak olarak bize bey‘ biz dahi dükkânlarımızda mıh tasnî‘ ve i‘mâl ve nizâmımız üzere na‘lband esnâfına bey‘ ve ol vechile te‘ayyüş edegelür iken bu esnâda mezbûr Mehmed Said Ağa bize bey‘ eylediği çubuk demirlerini harcı demirlerden yardırup ol vechile i‘mâl eylediğimiz mıhlar hîn-i i‘mâlimizde kırılıp na‘lband esnâfının dahi işlerine gelmemekle bey‘ u şirâmızda nizâ‘ vukū‘uyla esnâfımızın perîşaniyetimize bâ‘is olmağla fîmâ ba‘d has ve boşmak demir yardırup bize bey‘ etmek üzere merkūm Said Ağa’ya tenbîh olunmak matlûbumuzdur deyü da‘vâya tasaddî etmişdik el-hâletü hâzihî beynimiz tevfîk ve ıslâh olunup ba‘de’l-yevm mezbûr Mehmed Said Ağa tüccârdan demir iştirâ edecek oldukda esnâfımızın kethüdâsı ve ihtiyârlarından birkaç kimesnelere gösterip amelimize sâlih olan demiri iştirâ ve ba‘de’n-nakl içinde harc-ı demir zuhûr ederse bizim içün yardırmayıp enserci ve sâir esnâfa bey‘ ve has demiri yardırup bize bey‘ etmek üzere tarafeyn bi’t-terâzî kavl ve ittifâk eyledik deyü takrîrini mezbûr Na‘lbur Mehmed Said Ağa tasdîk ve ber-vech-i meşrûh ta‘ahhüd eylediği İstanbul Mahkemesi’nden huzûr [-ı âlîlerine i‘lâm olundu.] Fî 5 Ca sene 1237