İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 239 Hüküm no: 215 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerîfe Rukiye Hatun’un, Şerîfe Zeyneb Hatun bt. Receb’e olan borcunu ödemeyi kabul ettiği 100 guruşa hüküm Ma‘rûz[-ı dâ‘î-i devlet-i aliyyeleridir ki] Mübârek rikāb-ı kamer-tâb-ı hüsrevâneye arzuhâl takdîm eden zâtı mu‘arrefe Diyârbekirli Şerîfe Zeyneb Hatun bt. Receb Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘-i enverde derûn-ı arzuhâlde mezkûretü’l-ism kezâlik zâtı mu‘arrefe Diyârbekirli Şerîfe Rukiye Hatun bt. Ahmed muvâcehesinde ben ücret ile hizmet eder makūleden olup bundan akdem mezbûre Şerîfe Rukiye Hatun’un talebiyle beş sene müddetde Diyârbekir kazâsında ve ba‘dehû bi’l-ma‘iyye Âsitâne-i aliyyeye gelüp üç sene müddetde dahi Âsitâne-i aliyyede ücret kavlinsiz kendüye hizmet edüp lâkin mezbûra zikr olunan Diyârbekir kazâsında beşer sene müddetde eylediğim hizmetim mukābilinde ecr-i misil mutâlebemden rızâmla meccânen fâriğa olmamla ancak üç sene müddetde Âsitâne-i aliyyede eylediğim hizmetim mukābilinde ecr-i mislim olan yevmiye birer guruşdan cem‘an bin seksen guruşu taleb ederim deyü tasaddî eylediğim da‘vâmdan bâ-vesâtet-i muslihîn mezbûre Şerîfe Rukiye Hatun ile yüz guruş üzerine ba‘de akdi’l-musâlaha ve’l-kabûl bedel-i sulh-i merkūmdan mâ‘adâ ecr-i misil mutâlebeme ve sâir cemî‘ hukūk-ı şer‘iyyeye müte‘allika âmme-i da‘vâdan mezbûre Şerîfe Rukiye Hatun’un zimmetini kabûlü hâvî ibrâ ve iskāt ve ol vechile külliyen kat‘-ı nizâ‘ eyledim deyü mezbûre Şerîfe Zeyneb Hatun’un eylediği ikrâr u i‘tirâfını mezbûre Şerîfe Rukiye Hatun tasdîk ve ibrâdan müstesnâ bedel-i sulh-i merkūm yüz guruş zimmetinde deyni olduğunu ikrâr etmeğin mûcebince müdde‘iye-i mezbûreye talebiyle bedel-i sulh-i merkūmu edâ ve teslîmiyle ilzâm olunduğu İstanbul Mahkemesi’nden huzûr [-ı âlîlerine i‘lâm olundu.] Fî 13 Ca sene 1237