İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 239 Hüküm no: 216 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsak Balta v. Kidiveya’nın, Corci v. İstefan Rodo’ya olan borcunu ödemesi gerektiği 9.200 guruş hüküm Ma‘rûz[-ı dâ‘î-i devlet-i aliyyeleridir ki] Avrupa tüccârından olup hâlâ Sakız cezîresinde mütemekkin derûn-ı arzuhâlde mastûrü’l-ism Manol Rodo Kanaki v. Dimitri v. Manol nâm zimmî tarafından husûs-ı âtîde taleb ve da‘vâ ve husûmete ve ahz ü kabza ve havâle kabûlüne ve lede’l-iktizâ sulh ve ibrâya ve mütevakkıf olduğu umûrun küllîsine vekîl olduğu makbûlü’ş-şehâde idükleri bi’l-ihbâr mütehakkık olan Mike v. Nikoli ve Mihal v. Yanako zimmîler şehâdetleriyle ber-nehc-i şer‘î sâbit olan Avrupa tüccârından sâhib-i arzuhâl Corci v. İstefan Rodo Kanaki nâm zimmî bi’t-terâzî İstanbul mahkemesinde meclis-i şer‘-i münîrde Avrupa tüccârından derûn-ı arzuhâlde mastûrü’l-ism İsak Balta v. Kidiveya nâm Yahûdi muvâcehesinde mesfûr İsak Balta Yahûdi müvekkilim mesfûrun mâlından emriyle âhara bey‘ eylediği emti‘a-i mütenevvi‘a esmânından kezâlik emriyle bi’l-cümle makbûz müvekkilem mersûme medfû‘unun bin iki yüz otuz altı senesi hılâlinde vâki‘ mâh-ı Eylülün yirmi dördüncü gününde Avrupa tüccârı vekîlleri ma‘rifetleriyle sahîhan hesâbı rü’yet olundukta mesfûr İsak Balta Yahûdinin müvekkilim mersûmun mâlından emriyle âhara bey‘ eylediği emti‘a esmânından emriyle makbûzu olan gayr-ez teslîm doksan üç bin doksan yedi guruş on sekiz akçesini kendi umûruna sarfla istihlâk edüp ol vechile zimmetine ta‘alluk ettikden sonra meblağ-ı mezbûrun altı bin dört yüz seksen altı guruşunu ben mesfûr İsak Balta Yahûdi’nin ihâlesiyle bi’l-vekâle mahâll-i ma‘lûmdan kabûl ve istîfâ etmemle bâkī seksen altı bin beş yüz on bir guruş on sekiz akçenin on üç bin beş yüz altmış guruşunu dahi müvekkil-i mersûmun emriyle gāibân ani’l-beled Yani v. Nikoli v. Nikoli v. İsterati nâm zimmîlere edâ eyledim deyü mesfûr İsak Balta Yahûdi inkârıma ol mikdârda beni def‘a tasaddî etmekle meblağ-ı mezbûr on üç bin beş yüz altmış guruşun teslîm ve adem-i teslîminin tahkīkini tarafeyn asâleten ve vekâleten bi’t-terâzî gāibân-ı mesfûrânın mecîelerine ba‘de’t-tevkīf mâ‘adâsı olup mesfûr İsak Balta Yahûdinin zimmetinde kalan yetmiş üç bin elli bir guruş on sekiz akçenin dahi on üç bin elli bir guruş on sekiz akçesini bir def‘a ve sekiz yüz guruşunu bir def‘a ki cem‘an on üç bin sekiz yüz elli bir guruş on sekiz akçesini bâ-vesâtet-i muslihîn müvekkilim mersûma izâfetle sulhen bi’l-vekâle hat ve tenzîl eylediğimde ol dahi kabûl etmekle zimmetinde bâkī elli dokuz bin iki yüz guruş ile tahkīkini gāibân-ı mesfûrânın mecîlerine tevkīf eylediğimiz meblağ-ı mezbûr on üç bin beş yüz altmış guruşdan mâ‘adâ tenzîl eylediğim meblağayn-ı mezkûreyne ve bi’l-cümle husûs-ı mezkûra ve sâir hukūk-ı şer‘iyyeye müte‘allika âmme-i da‘vâdan müvekkilim mersûma izâfetle her birimiz âharın zimmetini kabûlü hâvî bi’l-vekâle ve bi’l-asâle ibrâ ve iskāt edüp ol vechile meblağayn-ı merkūmeynden mâ‘adâ müvekkilim mersûmun mersûm İsak Balta Yahûdi zimmetinde ve mesfûr İsak Balta Yahûdinin müvekkilim mersûm zimmetinde kat‘â hakları kalmayup ibrâdan müstesnâ meblağ-ı merkūm on üç bin beş yüz altmış guruşu gāibân-ı mesfûrânın mecîlerine tevkīf etmemle diğer istisnâ eylediğimiz meblağ-ı bâkī-i merkūm elli dokuz bin iki yüz guruşu mesfûr İsak Balta Yahûdiden bi’l-vekâle taleb ederim deyü eylediği takrîr ve da‘vâsını mesfûr İsak Balta Yahûdi bi-tamâmihâ tasdîk ve kendi umûruna sarfla istihlâk eylediği meblağdan bâkī ibrâdan müstesnâ meblağ-ı merkūm elli dokuz bin iki yüz guruş hâlâ zimmetinde müvekkil-i mersûma sahîhan deyni olduğunu tâyi‘an ve kat‘iyyen ikrâr u i‘tirâf etmeğin ikrârı mûcebince ibrâdan müstesnâ meblağayn-ı mezkûreynden sâlifü’z-zikr elli dokuz bin iki yüz guruşu müvekkil-i mesfûr içün vekîl-i müdde‘î-i mersûm Corci zimmîye edâ ve teslîme mesfûr İsak Balta Yahûdi’ye tenbîh olunduğu mahkeme-i mezbûreden huzûr [-ı âlîlerine i‘lâm olundu.] Fî 22 R sene 1237