İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 241 Hüküm no: 218 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hanım bt. Mustafa’nın, Mehmed Said Hâlet Efendi’nin mülkü olan menzilini istibdâl talebi İstibdâl Mukābele şüd Ma‘rûz[-ı dâ‘î-i devlet-i aliyyeleridir ki] E‘âzım-ı ricâl-i devlet-i aliyyeden hâlâ tevkî‘i-i dîvân-ı hümâyûn İnâyetlü Atûfetlü Mehmed Said Hâlet Efendi neclü’l-merhûm Hüseyin Efendi hazretlerinin bâ-hüccet-i şer‘iyye yedlerinde mülkleri olan bir bâb menzili zikri câ‘î vakf-ı menzil ile istibdâl murâd eden Fâtıma Hanım bt. Mustafa’nın Bâb-ı âliye takdîm eylediği işbu bir kıt‘a arzuhâli bâlâsına bu dâ‘îlerine hitâben sâdır olan fermân-ı âlîlerine imtisâlen savb-ı şer‘-i enverden irsâl olunan başkâtib Mevlânâ İbrahim Ârif Efendi dâ‘îleri hâssa mimarı hulefâsından es-Seyyid Ahmed Mümtaz ve Mustafa Halîfeler ile gallesinden İstanbul’da Saray-ı atîk-i ma‘mûre kurbünde Yakub Ağa Câmi‘-i şerîfi minâresinde leyâlî-i mübârekede revgan-ı zeyt iştirâsıyla îkād-ı kanâdil olunmak üzere kimesnenin nezâretinde olmayan merhûme diğer Fâtıma Hanım bt Habib nâm sâhibetü’l-hayrın Vakfı müsakkafâtından medîne-i Ebâ Eyyüb-i Ensârî -radiya anhu Rabbihi’l-Bârî-de Otakçılar nâm mahalde Fethiçelebi Mahallesinde vâki‘ bir tarafdan vakf-ı menzil-i mezbûrdan Bostanî Mandıracı es-Seyyid Mehmed Ağa menzili ve bir tarafdan ba‘zan tarîk-i has ve ba‘zan humbarahâne Dökücübaşısı Mehmed Ârif Ağa menzili bahçesi ve bir tarafdan yine mezbûr Mehmed Ârif Ağa menzili bahçesi taraf-ı râbi‘i tarîk-i âm ile mahdûd fevkānî iki bâb oda ve bir sedli sofa ve bir abdesthâne ve memşâ ve dîvânhane ve tahtânî bir bâb oda ve bir matbah ve bir memşâ ve bir mikdâr havlu ve bahçe ve bir bi’r-i mâ’ ve tarîk-i hâssa küşâde bir sokak kapısını müştemil tarafeyni taşduvarı hâvî bir bâb menzile varup cerîde de mazbûtü’l-esâmî Müslimîn huzûrlarında akd-i meclis-i şer‘-i âlî ettikte vakf-ı mezbûrun evlâdiyet ve meşrûtiyet üzere mütevelliyesi sâhibe-i arzuhâl mezbûre Fâtıma Hanım tarafından husûs-ı âti’l-beyânda vekîl olduğu zâtını ârifân Mehmed Ağa b. Ali ve es-Seyyid Abdullah Ağa b. Feyzullah nâm kimesneler şehâdetleriyle mahzar-ı hasm-ı câhidede ber-nehc-i şer‘î sâbit ve sübût-ı vekâletine hükm-i şer‘î lâhık olan dergâh-ı âlî gediklülerinden es-Seyyid Hayreddin Bey b. Ahmed meclis-i ma‘kūd-ı mezkûrda müşârun-ileyh Mehmed Said Hâlet Efendi hazretlerinin taraf-ı bâhirü’ş-şerîflerinden husûs-ı âtîde vekîl-i müseccel-i şer‘îleri müderrisîn-i kirâmdan Hâfız İsmail Efendi b. Mehmed mahzarında müvekkilem mezbûre Fâtıma Hanım’ın mütevelliyesi olduğu ceddesi mezbûre diğer Fâtıma Hanım vakfından senede altmış akçe icâreli işbu derûnunda akd-i meclis-i şer‘-i âlî olunan menzil müvekkil efendi-i müşârun-ileyh hazretlerinin bâ-hüccet-i şer‘iyye yedlerinde mülkleri olan İstanbul’da Karagümrük civârında Zincirlikuyu kurbünde Atîkalipaşa Mahallesinde vâki‘ bir tarafdan ba‘zan kuzâtdan merhûm Hamzazâde Lütfullah Efendi zevcesi Şerîfe Âişe Hanım bahçesi ve ba‘zan Kutucular menâzili demekle meşhûr kutucu esnâfından Hüseyin Ağa ve el-Hâc Hasan Ağa ve Ali Ağa ve Halil Ağa ve diğer Hüseyin Ağa ve Mehmed tasarruflarında olan menâzil ve bir tarafdan Nâtır Kadın menzili ve bir tarafdan süknâsı mârru’z--zikr Atîkalipaşa Câmi‘-i şerîfi imâmlarına meşrûta olan menzil ve bahçe ve taraf-ı râbi‘i tarîk-i âm ile mahdûd ve tarîk-i âm tarafında kâin fevkānî üç bâb oda ve bir abdesthâne ve memşâ ve dîvânhâne ve tahtânî bir bâb Bagdadi oda ve bir abdesthâne ve memşâ ve kömürlük ve matbah ve kiler ve mağselhâne ve Kutucular menâzili tarafında kâin tahtânî bir bâb oda ve bir matbah ve bir abdesthâne ve memşâ ve bir bi’r-i mâ’ ve eşcâr-ı müsmireli bahçe ve bahçe-i mezkûrede diğer bir bi’r-i mâ’ ve sokak kapısını müştemil etrâf-ı râbi‘ası taşduvarıyla muhât bir bâb mülk menzil ile istibdâl murâd olunmağla menzileyn-i mezkûreyn keşf ve mesâha ve tahmîn olunup istibdâli cânib-i vakfa enfa‘ ise i‘lâm olunmak matlûbumdur dedikde evvelâ menzil-i mevkūf-ı mezkûrun arsası mesâha ve tahmîn olundukta terbî‘an dört yüz kırk bir zirâ‘ beher zirâ‘ı altmış paradan altmış bir buçuk ve üzerinde kâin iki direk yüz yirmi zirâ‘ ebniye beher zirâ‘ı üçer guruşdan üç yüz altmış guruş ve şehinşin mahalli altı zirâ‘ beher zirâ‘ı altmış paradan dokuz guruş ve abdesthâne ve memşâ mahalli on iki zirâ‘ ve altı parmak beher zirâ‘ı birer guruşdan on iki guruş on para ve cunba mahalli bir buçuk zirâ‘ beher zirâ‘ı bir guruşdan bir buçuk guruş ve bahçede kâin küfeki taşdan bilezikli bir bi’r-i mâ’ yirmi beş guruş ve bahçe-i mezkûrenin tarîk-i has cânibinde merkūm Mehmed Ârif Ağa bahçesi tarafında olan kebîr taş duvar terbî‘an doksan iki zirâ‘ beher zirâ‘ı altmış paradan yüz Otuz sekiz guruş olup ol vechile arsa ve ebniye ve bi’r-i mâ’ ve duvarın min-haysü’l-mecmû‘ kıymeti bin iki yüz yedi guruş on paraya bâliğ olduğunu mimârân-ı mezbûrân ile zikr olunan Fethiçelebi Mahallesi ahâlîsinden ve ehl-i vukūfdan el-Hâc Abdülhamid Ağa b. Mehmed Emin ve Göksu bostancılarından mandıracı es-Seyyid Mehmed Ağa b. es-Seyyid Ali ve Hüseyin Ağa b. Ahmed ve Humbaracı es-Seyyid Hasan Ağa ve es-Seyyid Mehmed Said Ağa b. es-Seyyid İbrahim ve Pastırmacı es-Seyyid İbrahim Ağa b. es-Seyyid Süleyman nâm kimesneler ihbâr eylediklerinden sonra sâniyen müvekkil-i müşârun-ileyh hazretlerinin mülkleri olan Atîkalipaşa Mahallesinde vâki‘ menzil-i mahdûd-ı mezkûr üzerine varup menzil-i memlûk-ı mezkûrun arsası mesâha ve tahmîn olundukta terbî‘an bin dört yüz altmış üç zirâ‘ dokuz parmak beher zirâ‘ı yüz paradan üç bin altı yüz elli yedi buçuk guruş ve üzerinde mevcûd iki direk altmış dört zirâ‘ üç parmak ebniye beher zirâ‘ı beher guruşdan üç yüz yirmi guruş ve ittisâlinde şehinşin mahalli altı zirâ‘ on sekiz parmak beher zirâ‘ı [43a] beşer guruşdan otuz üç guruş otuz para ve yine ittisâlinde tahtânî kârgîr ocaklı matbah elli üç zirâ‘ dört parmak beher zirâ‘ı üçer guruşdan yüz elli dokuz guruş ve kutucular menâzili ittisâlinde kâin tahtânî ebniye yüz yirmi zirâ‘ iki parmak beher zirâ‘ı dörder guruşdan dört yüz seksen guruş ve bilezikli iki aded bi’r-i mâ’ ellişer guruşdan yüz guruş ve bahçe-i mezbûrenin etrâf-ı selâsesinde olan taşduvar üç yüz otuz zirâ‘ beher zirâ‘ı ikişer guruşdan altı yüz altmış guruş olup ol vechile arsa ve ebniye-i memlûke ve bi’r-i mâ’ duvarların min-haysü’l-mecmû‘ kıymeti beş bin dört yüz on paraya bâliğ olduğunu kezâlik mimârân-ı merkūmân ile zikr olunan Atîkalipaşa Mahallesi ahâlîsinden ve ehl-i vukūfdan İmâm Hâfız Mehmed Hâfız Efendi b. Lütfullah ve kuzâtdan el-Hâc Ahmed Efendi b. Süleyman ve kuzâtdan es-Seyyid Mehmed Emin Efendi b. es-Seyyid Abdulkādir ve Anadolu kalemi Muhzırbaşısı Hasan Ağa b. Abdullah ve Hammamî es-Seyyid Mehmed Esad Efendi b. es-Seyyid Mehmed Emin ve Berber Mustafa Ağa b. İbrahim nâm kimesneler ihbâr etmeleriyle ol vechile mülk olan menzil-i mezkûrun mahalli vakıf olan menzil-i mezkûrdan ahsen ve arsa ve cevdet ve vüs‘at ve kıymet ve rağbet ve ücret cihetlerinden ezyed ve evfer olup ol vechile şerâit-i istibdâl mevcûde olmağla istibdâli cânib-i vakfa enfa‘ idüğü zâhir olduğunu Mevlânâ-yı mezbûr dâ‘îleri mahallinde tahrîr ve ma‘an meb‘ûs ümenâ-i şer‘le meclis-i şer‘a inhâ etmeğin bu sûretde istibdâli tecvîz eden fukahâ-yı izâm -aleyhim rahmetü Rabbihim el-Meliki’l-Allâm- hazerâtının kavl-i şerîfleri üzere istibdâl olunmak bâbında izn-i hümâyûnu müş‘ir bâlâsı tuğra-yı garrâ-yı hazret-i cihândâri ile mu‘anven bir kıt‘a emr-i âlîşân sudûru recâsına İstanbul Mahkemesi’nden huzûr [-ı âlîlerine i‘lâm olundu.] Fî 13 Ca sene 1237