İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 250 Hüküm no: 226 Orijinal metin no: [44a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abraham v. Dimitri’nin kapatılan sabun dükkanının tekrar açılmasına müsaade edildiği Mukābele şüd Ma‘rûz[-ı dâ‘î-i devlet-i aliyyeleridir ki] Âsitâne-i aliyyede kâin sabuncu esnâfından sâhib-i arzuhâl Abraham v. Dimitri nâm zimmînin tevzî‘den aldığı sabunu mahalle-i âhara bey‘ine binâen li-ecli’t-tedîb mahmiye-i mezbûrede Zindânkapısı dâhilinde ipçiler içinde vâki‘ ahz ü i‘tâ eylediği bir bâb sabuncu dükkânı bundan akdem sedd ü bend ve esnâf-ı merkūma tevzî‘ olunan sabundan hisse tevzî‘i kat‘ olunup bir müddetden berü dükkân-ı mezkûru mesdûd idüğünü beyân ile dükkân-ı mezkûru feth ve küşâd olunup hisse tevzî‘i i‘tâ buyrulmak bâbında bâ-arzuhâl istid‘â-yı inâyet ettikden sonra mesfûr Abraham zimmî fîmâ ba‘d tevzî‘den aldığı sabunu hâricden memnû‘ olan mahallere bey‘ etmeyüp zikr olunan dükkânında tamamen Dârü’s-saltanâti’s-seniyyede sâkin ibâdullâha bey‘ [44b] etmek üzere ta‘ahhüd ve eğer hilâf-ı ta‘ahhüd hareketi zuhûr ederse küreğe vaz‘ olunmağla tedîb olunmağla râzı olduğunu meclis-i şer‘de esnâf-ı merkūme kethüdâsı el-Hâc Ahmed Ağa ve esnâfından es-Seyyid el-Hâc İbrahim Ağa ve es-Seyyid el-Hâc Emrullah Ağa ve el-Hâc Hasan Ağa ve es-Seyyid Mehmed Ârif Ağa ve es-Seyyid Ali Ağa ve diğer es-Seyyid Ali Ağa ve es-Seyyid Süleyman Ağa ve sâirleri hâzır oldukları hâlde takrîr ve ol bâbda istid‘â-yı inâyet ettikte esnâf-ı hâzirûn-ı merkūmûn dahi zimmî-i mersûmun ta‘ahhüdünü kabûl ve dükkân-ı mezkûrînin küşâdıyla hisse tevzî‘inin i‘tâ buyrulmasını iltimâs etmeleriyle ol bâbda fermân-ı âlîleri sudûru iktizâ eylediği imtisâlen li’l-emri’l-âlî İstanbul Mahkemesi’nden huzûr [-ı âlîlerine i‘lâm olundu.] Fî 8 Ca sene 1237