İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 251 Hüküm no: 227 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rumeli’den İstanbul’a getirilen koyunların kasap esnafına dağıtımı Fiyat-ı lahm-ı ganem Mukābele şüd Ma‘rûz[-ı dâ‘î-i devlet-i aliyyeleridir ki] Ağnâm celebânından Vilâyet-i Rumeli’nde vâki‘ Avratalan nâm mahalde n bin yüz re’s kıvırcık ağnâmı getiren Halil Ağa ve sekiz yüz re’s ağnâm sâhibi olan İskender Ağa nâm kimesneler ile dört yüz elli re’s ağnâma mâlik tonço ve sekiz yüz re’s ağnâmı olan panço ve bin yüz re’s ağnâmı olan diğer panço ve beş yüz re’s ağnâmı olan Mayed ve beş yüz re’s ağnâmı olan Pavli ve yedi yüz re’s ağnâmı olan Kopalolça ve dört yüz re’s ağnâmı olan Acı Üstüyani ve üç yüz elli re’s ağnâmı olan Üstüyo ve yedi yüz re’s ağnâmı olan Kazerespo ve dört bin re’s ağnâmı olan Falko ve iki bin altı yüz re’s ağnâmı olan Küçük Kalfo nâm zimmîler ve yine Vilâyet-i Rumeli’nde Karinabad cânibinden gelen ağnâmı ashâbından beş yüz yetmiş re’s ağnâm mâliki Kırkkenîseli el-Hâc Süleyman Ağa ve altı yüz re’s ağnâm sâhibi Filibeli İmâm Ali Efendi ve bin yüz re’s ağnâm sâhibi Kızanlı es-Seyyid Musa nâm kimesneler ile altı yüz re’s ağnâm sâhibi Kızanlı Üstüyan ve bin altı yüz ağnâm sâhibi Başköylü Osko ve beş yüz elli re’s ağnâm sâhibi Üstüyo Corbacı ve bin iki yüz re’s ağnâm sâhibi Kocametro ve bin iki yüz re’s ağnâm sâhibi Kızanlı Nikola ve bin iki yüz ağnâm sâhibi Kızanlı Petro ve üç yüz yetmiş re’s ağnâm sâhibi Kırkkenîseli Dimitri ve beş yüz re’s ağnâm sâhibi Acı Nikola nâm zimmîler ve yine vilâyet-i Rumeli’nde vâki‘ Samako cânibinden vârid olan ağnâm ashâbından bin üç yüz re’s ağnâma mâlik olan Razlıklı Mustafa Ağa nâm kimesne ile bin beş yüz re’s ağnâm sâhibi Çavdar Yuvan ve bin iki yüz elli re’s ağnâma mâlik olan Malavan ve bin üç yüz re’s ağnâm sâhibi olan Molaço oğlu Yuvan ve yedi yüz elli re’s ağnâm sâhibi Otlu karyeli Velko ve yedi yüz re’s ağnâm sâhibi Derbendli Neldo ve yedi yüz re’s ağnâm sâhibi Nikola ve yedi yüz elli re’s ağnâma mâlik olan Otlu karyeli Lolço ve yedi yüz elli re’s ağnâma mâlik Vanço nâm zimmîler meclis-i şer‘-i münîrde hâlâ hâssa kasabbaşısı hâcegân-ı dîvân-ı hümâyûndan es-Seyyid Ali Efendi tarafından mürsel Çukadâr Mustafa Ağa b. Ali hâzır olduğu hâlde hâlâ kasablar kethüdâsı el-Hâc Hasan Ağa b. el-Hâc Osman mahzarında Yedikule kassab ustalarından Hasan Efendi ve el-Hâc İbrahim Ağa ve Eğrikapu kasab ustalarından el-Hâc Mustafa Ağa ve Topkapılı Mustafa Ağa kezâlik hâzır oldukları hâlde biz ber-minvâl-i muharrer Âsitâne-i aliyyeye Avratalan nâm mahalde n mâlımızdan sevk ve tesyîr eylediğimiz cem‘an on dört bin re’s kıvırcık ağnâmı ve Karinabad ve cânibinden kezâlik sevk ve tesyîr eylediğimiz bâlâda muharrer cem‘an dokuz bin dört yüz doksan re’s kıvırcık ağnâmı ve Samako tarafından kezâlik sevk ve tesyîr eylediğimiz mârrü’l-beyân cem‘an on bir bin dört yüz re’s kıvırcık ağnâmı ki min-haysü’l-mecmû‘ otuz dört bin sekiz yüz doksan re’s kıvırcık ağnâmımızın bundan akdem bâ-fermân-ı âlî verilen nizâm üzere lühûmunun beher vakıyyesini kassabân esnâfına sakat semeni taleb etmemek üzere otuz yedi paraya tevzî‘ ve ağnâm-ı mezkûrenin mikdâr ve fiyatını mübeyyin yaftalarını hîn-i tevzî‘den elli bir gün mürûrunda bize teslîme kethüdâ-yı merkūm ve akçelerini hîn-i tevzî‘den doksan bir gün tamamında bize tamamen edâya ve lühûmunun beher vakıyyesini narh-ı cârî üzere kırkar paraya ibâdullâha bey‘e kasabbaşı-i mûmâ-ileyhin inzımâm-ı re’y ile esnâf-ı merkūmûn ta‘ahhüd ve tarafeynden her birimiz âharın ta‘ahhüdünü kabûl eyledik dediklerini kethüdâ-yı merkūm ba‘de’t-tasdîk ber-mûceb-i nizâm tevzî‘e ta‘ahhüd eylediklerinden sonra ağnâm-ı mezkûreden mâ‘adâ Rumeli celebânından Doriçe tarafından ağnâm celb eden Dimitri zimmînin altı bin ve Ömer Ağa’nın dört bin ve Zağralı Emin Ağa’nın iki bin yedi yüz ve Belgradköylü Panayot zimmînin bin dört yüz ve ma‘lûmü’l-esâmî celeb tâifesinin on altı bin re’sleri ki cem‘an otuz bin yüz re’s kıvırcık ağnâmını dahi ber-vech-i muharrrer verilen nizâm üzere tevzî‘a ta‘ahhüdlerini kethüdâ-yı merkūm inhâ eylediği İstanbul Mahkemesi’nden huzûr-ı âlîlerine i‘lâm olundu. Fî 2 Ca sene 1237