İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 252 Hüküm no: 228 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiko v. Panayati’nin, Yedikule’deki kasap dükkânı gediğini Metro’ya devrettiği Kasab ferağı Mukābele şüd Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm-ı mağfiret-nişan Sultan Abdülhamid Hân -subbet aleyhi sicâlü’l-afv ve’l-Gufrân- hazretlerinin evkāf-ı şerîflerinden Yedikule hâricinde kâin gayr-ez selhhâne-i mîrî on aded ganem selhhânelerinden ikinci selhhâneye merbût kassab dükkânlarından Arnabud karyesinde hisar dükkânına karib bir bâb dükkân derûnunda bir aded gedik ve yine selhhâne-i merkūmeye merbût kasaba-i Beşiktaş’da Cevizaltında kâin bir bâb dükkân derûnunda nısf hisse gedik ve yine hisse-i mezbûrede Hayreddin Paşa Türbesi kurbünde vâki‘ bir bâb dükkân derûnunda nısf gedik ve yine kasaba-i mezbûrede Sinan Paşa Câmi‘-i şerîfi köşesinde kâin bir bâb dükkân derûnunda nısf hisse gedik ve yine kasaba-i mezbûrede Paşa Mahallesi’nde kahveci dükkânına muttasıl bir bâb dükkân derûnunda nısf hisse gedik Kasımpaşa’da Tatavla nâm mahalde kâin bir bâb dükkân derûnunda kezâlik nısf hisse gedik dördüncü selhhâneye merbût kasaba-i Beşiktaş’da [45a] sığır kasabı dükkânına muttasıl bir bâb dükkân derûnunda nısf gedik ve Ortaköy’de selhhâne önünde kâin bir bâb dükkân derûnunda kezâlik nısf hisse gedik ve yine Arnabud köyünde kuyubaşında kâin bir bâb dükkân derûnunda nısf hisse gedik ve yedinci selhhâneye merbût Kılıç Ali Paşa Mahallesi’nde cânib-i câmi‘-i şerîfde kâin bir bâb dükkân derûnunda bir aded gedik mutasarrıfı Kosta v. Nako zimmî hâlik olup terk eylediği dört nefer evlâdından Rumeli’nde Ergiri kazâsında mütemekkine sulbiye kebîre kızı Zokine Nasrâniye ile sulbî kebîr oğlu Metro zimmîden her birine zikr olunan gedikleri ve hisse-i merkūmelerin her birerlerinden dörder sehm i‘tibâriyle birer sehmi âdiyen ba‘de’l-intikāl mersûme Zokine Nasrâniye tarafından zikri âtî ferağını ikrâra vekâleti şahsını bilir Dito v. Yorgaki ve Sava v. Vasil nâm zimmîler şehâdetleriyle ber-nehc-i şer‘î sâbit olan kasab Nikolaki v. Noto zimmî meclis-i şer‘-i münîrde müvekkile-i mersûmenin karındaşı mesfûr Metro zimmî tarafından ber-vech-i âtî tasdîka vekîl-i şer‘îsi Ortaköylü kassab Kiko v. Panayati nâm zimmî muvâcehesinde hâlâ hâssa kasabbaşısı hâcegân-ı dîvân-ı hümâyûndan es-Seyyid Ali Efendi tarafından mürsel vekîli kassablar kethüdâsı el-Hâc Hasan Ağa b. el-Hâc Osman hâzır olduğu hâlde müvekkile-i gāibe-i mersûme Zokiye Nasrâniye zikr olunan gedikleri ve hisse-i merkūmelerden her birinden dörder sehm i‘tibâriyle babam hâlik-i mersûmdan âdiyen bana intikāl eden birer sehm hisse-i şâyi‘amı hüsn-i rızâ ve tayyib-i ihtiyârım ve ferağ-ı mu‘teber-i kat‘î ile bedel-i ma‘lûm ve makbûz mukābelesinde karındaşım müvekkil-i mersûm Metro zimmîye bâ-re’y-i mütevellî ferağ ve tefvîz eylediğimde ol dahi teveffüz ve kabûl ve hisse tevzî‘ini ustalar ma‘rifetleriyle tamamen ahz etmek üzere ta‘ahhüd edüp fîmâ ba‘d zikr olunan gedikleri ve hisse-i mezkûrelerin her birinden ber-i‘tibâr-ı merkūm birer sehmde benim kat‘â alâka ve medhalim kalmayup karındaşım müvekkil-i mersûm Metro zimmînin hakk-ı müfavvazı olmuşdur deyü bi’l-vekâle ba‘de’l-ikrâr ve’t-tasdîk zikr olunan gedikler ve hisse-i merkūmelerin her birinden ber-i‘tibâr-ı merkūm birer sehmi kız karındaşı müvekkile-i mersûmenin ferağından ve birer sehmi babası hâlik-i mersûmdan intikālen ki cem‘an her birinden ikişer sehmini müvekkil-i mersûm Metro zimmînin zabt ve tasarrufu içün cânib-i vakf-ı müşârun-ileyhimden temessük i‘tâsı bâbında vekîl-i mersûm Kiko zimmî istid‘â-yı inâyet eylediği İstanbul Mahkemesi’nden huzûr [-ı âlîlerine i‘lâm olundu.] Fî 9 Ca sene 1237