İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 253 Hüküm no: 229 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Çavuş b. Hüseyin’in, kefaletinden dolayı Avramaki v. Nikola’dan aldığı parayı iade etmesi gerektiği 3.000 guruş reddi Mukābele şüd Ma‘rûz[-ı dâ‘î-i devlet-i aliyyeleridir ki] Sarraf tâifesinden Avramaki v. Nikola zimmî meclis-i şer‘-i enverde mültezim tâifesinden Mehmed Bey b. Ömer muvâcehesinde tersâne-i âmire çavuşlarından es-Seyyid Mehmed Çavuş b. es-Seyyid Hüseyin nâm kimesne ile merkūm Mehmed Bey’in sarrafı derûn-ı arzuhâlde mastûrü’l-ism Konarta v. Çelbon nâm Yahûdi hâzır oldukları hâlde merkūm Mehmed Bey nezâret-i hazret-i Şeyhülislâmîde âsûde evkāfdan cennet-mekân firdevs-âşiyân merhûm Sultan Bâyezid-i Velî Han -tâbe serâhu- hazretlerinin vakf-ı şerîfi müstagallâtından haslar kalemi mukāta‘asını bin iki yüz otuz dört senesi Martı ibtidasından Şubatı gāyetine değin bir sene zabt etmek üzere bedel-i ma‘lûm ile ba‘de’l-iltizâm vakf-ı müşârun-ileyh müstegallâtından mukāta‘a-i mezkûre dâhilinde olan Şamlar mukāta‘asını kendi ifrâz ve sene-i merkūmeye mahsûben hâzır-ı mezbûr es-Seyyid Mehmed Çavuş ile gāibân ani’l-meclis Veliyüddin Bey ve es-Seyyid Ömer Ağa nâm kimesnelere yedi bin yedi yüz elli guruş bedel-i iltizâm ile iştirâken ilzâm eylediğinde onlar dahi bedel-i iltizâm-ı merkūm zimmetlerinde her biri âhara kefîl olarak deynleri olmak üzere merkūm Mehmed Bey’e bir kıt‘a temessük i‘tâ ben dahi bedel-i iltizâm-i merkūma kefîl bi’l-mâl ve dâmin oldum deyü temessük-ı merkūm bâlâsına tahrîr ve temhîr ettikden sonra meblağ-ı mezbûr yedi bin yedi yüz elli guruşun bin guruşunu sene-i mezbûre Cemâziyelevvelîsi’nin on beşinci gününde nakden ve üç bin yedi yüz elli guruşunu bin iki yüz otuz beş senesi Rebî‘ülevvelinin on beşinci gününde gāib-i mezbûr Veliyüddin Bey’in kasr-ı yed eylediği emti‘a gümrüğü eshâmından hissesi bedelinden ki cem‘an dört bin yedi yüz elli guruşunu mezbûrûndan ahz ü kabz etmekle mâ‘adâsı olan üç bin guruşunu dahi mücerred sen bedel-i iltizâm-ı mezkûra kefîl bi’l-mâl olmuşidin deyü bi-gayr-ı hakkın benden ahz etmeğin meblağ-ı merkūmu mezbûr Mehmed Bey’den istirdâd ederim deyü hâzır-ı mezbûr es-Seyyid Mehmed Çavuş’un tasdîkiyle ba‘de’d-da‘vâ ve’l-istintak mezbûr Mehmed Bey dahi cevâbında bedel-i iltizâm-ı merkūmdan mezbûr es-Seyyid Mehmed Çavuş ile gāibân-ı mezbûrân zimmetlerinde yedime i‘tâ eyledikleri temessük mantûkunca her biri âhara kefîl olarak alacağım olan meblağ-ı mezbûr yedi bin yedi yüz elli guruşa mesfûr Avramaki zimmî kefîl bi’l-mâl oldukdan sonra meblağ-ı merkūmun dört bin yedi yüz elli guruşunu merkūmûndan ber-vech-i muharrer kabz etmemle mâ‘adâsı olan üç bin guruşunu dahi kefâlet-i merkūmeye binâen müdde‘î-i mersûm Avramaki zimmîden ahz ü kabz eyledim deyü müdde‘î-i mersûmun da‘vâ-yı mezkûresini bi-tamâmihâ ikrâr u i‘tirâf etmeğin ikrârı mûcebince bedel-i iltizâma kefâlet-i sahîha ve meşrû‘a olmamağla kefâlet-i merkūmeye binâen kabzını mu‘terif olduğu meblağ-ı merkūm üç bin guruş mezbûr Mehmed Bey’den red ile müdde‘î-i mersûm Avramaki zimmîye teslîm olunmak şer‘an lâzım geldiği İstanbul Mahkemesi’nden huzûr [-ı âlîlerine i‘lâm olundu.] Fî 12 Ca sene 1237