İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 255 Hüküm no: 230 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiro v. Kosti’nin, Yedikule’deki kasap dükkânı gediğini İbrahim Usta’ya devrettiği Kassab ferağı Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm Sultan Abdülhamid Hân -tâbe serâhu- hazretlerinin evkāf-ı hümâyûnlarından İstanbul’da Yedikule hâricinde vâki‘ gayr-ez selhhâne-i mîrî on aded ganem selhhânelerinden altıncı selhhâneye merbût kasab dükkânlarından İstanbul’da Sulumanastır nâm mahalde vâki‘ ma‘lûmü’l-hudûd bir bâb kasab dükkânı derûnunda mevcûde beyne’l-hiref gedik tâ‘bir olunur vakf-ı âlât-ı lâzıme-i ma‘lûmeye mutasarrıf olan Kiro v. Kosti v. Atam nâm zimmî tarafından zikri âtî ferağı ikrâra vekîl olduğu kassablar kethüdâsı el-Hâc Hasan Ağa b. el-Hâc Osman ve Kassab es-Seyyid Hasan Usta b. Hasan şehâdetleriyle ber-nehc-i şer‘î sâbit olan cebehâne-i âmire satırcısı Kosta v. Anderya nâm zimmî meclis-i şer‘-i enverde hâlâ hâssa kasabbaşısı dergâh-ı âlî kapıcı başılarından es-Seyyid el-Hâc Mustafa Ağa tarafından mürsel vekîli kasablar kethüdâsı mezbûr [45b] el-Hâc Hasan Ağa hâzır olduğu hâlde bâ‘isü’l-i‘lâm kasab ustalarından İbrahim Usta b. Ebûbekir muvâcehesinde müvekkilim mesfûr Kiro zimmî zikr olunan kasab dükkânı derûnunda mevcûde beyne’l-hiref gedik tâ‘bir olunan vakf-ı âlât-ı lâzıme-i ma‘lûmemi hüsn-i rızâ ve tayyib-i ihtiyârım ve ferağ-ı mu‘teber-i kat‘î ile merkūm İbrahim Usta’ya bedel-i ma‘lûm ve makbûz mukābelesinde bâ-re’y-i mütevellî ferağ ve tefvîz eylediğimde ol dahi ber-vech-i muharrer tefevvüz ve kabûl ve hisse tevzî‘ini ustalar ma‘rifetleriyle tamamen ahz etmek üzere ta‘ahhüd edüp fîmâ ba‘d zikr olunan vakf-ı âlât-ı lâzıme-i ma‘lûmede benim kat‘â alâka ve medhalim kalmayup merkūm İbrahim Usta’nın dâhil-i havza-i tasarrufu olmuşdur dedi deyü bi’l-vekâle ba‘de’l-ikrâr ve’t-tasdîk âlât-ı lâzıme-i mezkûreyi fâriğ müvekkil-i mesfûr Kiro zimmînin ferağ ve kasr-ı yedinden merkūm İbrahim Usta zabt ve tasarrufu içün cânib-i vakf-ı müşârun-ileyhdan bir kıt‘a temessük i‘tâsı bâbında istid‘â-yı inâyet eylediği İstanbul Mahkemesi’nden huzûr [-ı âlîlerine i‘lâm olundu.] Fî 17 Ca sene 1237