İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 255 Hüküm no: 231 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ali Ağa b. Hüseyin’in, Kumkapı’daki berber gediğini Mustafa Usta b. Ali’ye sattığı Berber gediği nakli Mukābele şüd Ma‘rûz[-ı dâ‘î-i devlet-i aliyyeleridir ki] Mahmiye-i İstanbul’da kâin berber esnâfından es-Seyyid Ali Ağa b. Hüseyin nâm kimesne meclis-i şer‘-i enverde yine esnâf-ı mezkûreden Mustafa Usta b. Ali muvâcehesinde berberler kethüdâsı İbrahim Ağa b. el-Hâc Abdurrahman ve berberler şeyhi es-Seyyid eş-Şeyh el-Hâc Osman Efendi b. Salih ve Yiğitbaşı es-Seyyid Mehmed Nuri Ağa b. Osman ve du‘âcıları el-Hâc Abdullah Efendi b. Ali ve Çavuş Mustafa Usta b. Ali ve köşe ustası Selim Ağa b. Abdullah hâzır oldukları hâlde mahmiye-i mezbûrede Kumkapı hâricinde vâki‘ ma‘lûmü’l-hudûd bir bâb berber dükkânı derûnunda mevcûde beyne’l-hiref gedik tâ‘bir olunur berber âlât-ı lâzıme-i ma‘lûmesi yedimde olan bir kıt‘a arzuhâlim hâmişinde muharrer derkenâr olunan sûret mûcebince Bursalı Dimitri ismine başmuhâsebe kaleminde mukayyed olup ba‘dehû tedâvül-i eydî ile bâ-hücec-i şer‘iyye bey‘ u şirâ olunarak akd-i âti’z-zikrin sudûruna değin yedimde mâl-ı müşterâm olmağla ben ber-vech-i muharrer mâlik olduğum mukayyed ve mu‘teber sâlifü’z-zikr berber gediği âlâtını tarafeynden bi’l-îcâb ve’l-kabûl şürût-ı müfsideden ârî bâtten ve sahîhan bi-safkatin vâhidetin yüz elli guruş semen-i makbûza mezbûr Mustafa Usta’ya bey‘ ve temlîk ve teslîm ol dahi yedimden iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini kabûlü hâvî ibrâ ve iskāt dahi etmemizle fîmâ ba‘d âlât-ı lâzıme-i mezkûrede benim kat‘â alâka ve medhalim kalmayup mezbûr Mustafa Usta’nın mâl-ı müşterâsı olmuşdur deyü ba‘de’l-ikrâr ve’t-tasdîk mezbûr Mustafa Usta meclis-i şer‘-i münîrde ashâb-ı hayrâtdan merhûm Devlethan Vakfı müsakkafâtından zikr olunan Kumkapı hâricinde bir tarafdan sütçü ve bir tarafdan attâr dükkânları beynlerinde kâin mukaddemâ gedikden hâlî bir bâb mağaza ve bir bâb abacı dükkânı olup el-yevm binâ ve inşâ olunan bir bâb dükkânın mukaddemâ mağaza olan mahal ve ebniyesi ile verâsında olan arsa-yı hâliyeyi bi’l-icâreteyn mutasarrıfı olan işbu hâzır bi’l-meclis Abdülhalim Efendi b. Yusuf nâm kimesne iş bu târih-i i‘lâmdan beher şehr on dörder buçuk guruşa ve mukaddemâ abacı dükkânı olan mahal ve ebniyeyi kezâlik bi’l-icâreteyn mutasarrıfı olan diğer hâzır bi’l-meclis Halil Alemdâr b. İsmail nâm kimesne kezâlik târih-i merkûrdan beher şehr üçer buçuk guruşa ki cem‘an şehriye on sekizer guruş kirâ ile bana îcâr etmeleriyle ol vechile dükkân-ı merkūmda kimesnenin gediği olmayarak müşâhereten müstecir olmamla bâlâda tahrîr olunduğu üzere mukaddemâ başmuhâsebe kaleminde Bursalı Dimitri ismine mukayyed olan bir bâb berber dükkânı derûnunda mevcûde şirâen mâlım olan gedik âlât-ı lâzıme-i mezkûrem esnâfımızın kezâlik derkenâr olunan nizâmları şürûtu üzere civârında vâki‘ kimesnenin gediği olmayan müsteciri olduğum dükkân-ı merkūma mutasarrıfları hâzırân-ı mezbûrânın rızâlarıyla naklolunup dükkân-ı mezkûrun kadîm gediğinin kaleminde Bursalı Dimitri ismine olan kayd-ı atîki ref‘ ve terkīn ve müsteciri olduğum dükkân-ı mezkûra naklini müş‘ir kendi ismime kayd ile sûret i‘tâ buyrulmak bâbında istid‘â-yı inâyet eylediğim i‘lâm olunmak matlûbumdur deyü takrîr ve iltimâs ettikte mukırr-ı mezbûr Mustafa Usta’nın takrîr-i meşrûhu esnâf-ı merkūmenin mukayyed ve mer‘î olan nizâmları şürûtuna mutâbık idüğünü esnâf-ı hâzirûn-ı mezbûrûn haber verdiklerinde müsteciri olduğu dükkân-ı merkūmun bilâ-gedik mutasarrıfları ve sâhibleri olan hâzırân-ı mezbûrân Abdülhalim Efendi ve Halil Alemdâr dahi dükkân-ı merkūma zikr olunan gediğin naklolunduğuna râzılar olmalarıyla ol vechile mezbûr Mustafa Usta’nın istid‘âsı mûcebince şürût-ı nizâmları üzere sûret i‘tâ buyrulmak bâbında fermân-ı âlîleri sudûru iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 23 Ca sene 1237