İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 257 Hüküm no: 232 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Loni v. Mike ve ortaklarının, hâzırcı gediğini Fesci Ömer Ağa ile Fesci Mehmed Said Ağa’ya sattıkları Hâzırcı gediği mübâya‘ası ve ismine kaydı Ma‘rûz[-ı dâ‘î-i devlet-i aliyyeleridir ki] Mahmiye-i İstanbul’da kâin hâzırcı esnâfından Loni v. Mike zimmî şerîkleri Panayot ve karındaşı Kostandi v. Yorgi nâm zimmîler hâzır oldukları hâlde meclis-i şer‘-i münîrde Fesci Ömer Ağa b. Salih b. Celîdâs? ve Fesci Mehmed Said Ağa b. el-Hâc Mehmed b. Celîdâs? nâm kimesne muvâcehelerinde hâzırcı esnâfının ustabaşıları Manol v. Mihal ve Anton v. Yani nâm zimmîler kezâlik hâzır oldukları mahmiye-i mezbûrede Çarşı-yı Kebîr’de du‘â meydanında abacılar caddesinde fesciler sûkunda vâki‘ Anton ve Kirkor zimmîler dükkânları beynlerinde kâin iki kepenk bir bâb dükkân derûnunda mevcûde beyne’l-esnâf hâzırcı gediği tâ‘bir olunur âlât-ı lâzıme-i ma‘lûmenin nısfı benim ve nısf-ı âharı şerîklerim hâzırân-ı mersûmân Panayot ve Kostandi zimmîlerin yedlerimizde olan iki kıt‘a sûret mantûklarınca akd-i âti’z-zikrin sudûruna değin yedlerimizde mâlımız ve mülkümüz olmağın benim ve şerîklerim hâzırân-ı mersûmân Panayot ve Kostandi zimmîler ber-vech-i muharrer mâlikler olduklarımız hâzırcı [46a] gediği tâ‘bir olunan âlât-ı lâzıme-i mezkûreyi tarafeynden bi’l-îcâb ve’l-kabûl şürût-ı müfsideden ârî bâtten ve sahîhan bi-safkatin vâhidetin altı bin beş yüz guruşa nısfiyet üzere mezbûrân Fesci Ömer Ağa ve Fesci Mehmed Said Ağa’ya bey‘ ve temlîk ve teslîm eylediğimizde onlar dahi nısfiyet üzere iştirâken iştirâ ve temellük ve tesellüm ve kabz ve kabûl ve semeni olan meblağ-ı merkūm altı bin beş yüz guruşa benimle hâzırân-ı mersûmâna def‘ ve teslîm eylediklerinde biz dahi yedlerinde bi-kadri’l-hısas tamamen ahz ü kabz edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt dahi etmemizle fîmâ ba‘d zikr olunan hâzırcı gediği tâ‘bir olunur âlât-ı lâzıme-i ma‘lûmede benim hâzırân-ı mesfûran Panayot ve Kostandi zimmîlerin kat‘an alâka ve medhalimiz kalmayup nısfı merkūm Fesci Ömer Ağa’nın ve nısf-ı âharı merkum Fesci Mehmed Said Ağa’nın mâl-ı müşterâları olmuşdur deyü her biri ba‘de’l-ikrâr ve’t-tasdîk zikr olunan hâzırcı gediği tâ‘bir olunur âlât-ı lâzıme-i ma‘lûmenin bâyi‘ûn-ı mersûmûn Loni ve şerîkleri Panayot ve Kostandi isimlerine başmuhâsebe kaleminde mukayyed olan iki kıt‘a sûretleri kaydı ref‘ ve terkīn ve müşteriyân-ı mezbûrân Fesci Ömer Ağa ve Fesci Mehmed Said Ağa’nın nısfiyet üzere isimlerine kayd ile yedlerine başka başka sûret i‘tâsı bâbında istid‘â-yı inâyet eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 23 Ca sene 1237