İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 258 Hüküm no: 233 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Abdulkādir’in, tütüncü gediğini Seyyid Ömer Ağa’ya sattığı Tütüncü gediği mübâya‘ası Mukābele şüd sahîhdir Ma‘rûz[-ı dâ‘î-i devlet-i aliyyeleridir ki] Mahrûse-i Galatasarayı kapıcılarından Mustafa Ağa b. Abdulkādir meclis-i şer‘-i münîrde hâlâ dâmâdı bâ‘isü’l-i‘lâm Ankaralı es-Seyyid Ömer Ağa b. es-Seyyid İbrahim mahzarında esnâf-ı merkūme kethüdâsı vekîli es-Seyyid Mustafa Ağa ve Yiğitbaşı es-Seyyid Abdullah Çelebi ve sâirleri hâzır oldukları hâlde takrîr-i kelâm edüp akd-i âti’z-zikrin sudûruna değin bir kıt‘a sûret mantûkunca müstakillen yedimde mâlım ve mülküm olan İstanbul’da Mercan çarşısında turşucu ittisâlinde vâki‘ ma‘lûmü’l-hudûd bir bâb tütüncü dükkânı derûnunda mevcûde maden kaleminde mukayyed beyne’l-esnâf gedik tâ‘bir olunan âlât-ı lâzıme-i ma‘lûmemi tarafeynden bi’l-îcâb ve’l-kabûl şürût-ı müfsideden ârî bâtten ve sahîhan bi-safkatin vâhidetin üç bin beş yüz guruş semen-i medfû‘ ve makbûza dâmâdım mezbûr es-Seyyid Ömer Ağa’ya bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt etmemizle ba‘de’l-yevm âlât-ı lâzıme-i merkūmede benim kat‘â alâka ve medhalim kalmayup dâmâdım mezbûr es-Seyyid Ömer Ağa’nın mülk-i müşterâsı olmuşdur deyü eylediği takrîr-i meşrûhunu mezbûr es-Seyyid Ömer Ağa ba‘de’t-tasdîk mezbûr es-Seyyid Ömer Ağa âlât-ı lâzıme-i mezkûrenin kaleminde merkūm Kapıcı Mustafa Ağa üzerine olan kayd-ı atîki ref‘ ve terkīn ve kendi ismine kayd ile yedine müceddeden sûret i‘tâsı istid‘âsında olmağın istid‘âsı üzere âlât-ı lâzıme-i mezkûrenin merkūm Kapıcı Mustafa Ağa üzerinde olan kaydı ref‘ ve terkīn ve dâmâdı müşteri-i mezbûr es-Seyyid Ömer Ağa ismine kayd ile sûret i‘tâsı iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 25 Ca sene 1237