İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 259 Hüküm no: 234 Orijinal metin no: [46a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin Ağa’nın, Salih Ağa b. Mustafa aleyhine açtığı davada iddiasını ispat edemediğinden muarazadan men edildiği Mu‘ârazadan men‘ berberân Mukābele şüd Ma‘rûz[-ı dâ‘î-i devlet-i aliyyeleridir ki] Derûn-ı arzuhâlde mezkûrü’l-ism Kahveci Mehmed Emin Ağa b. Hüseyin meclis-i şer‘-i münîrde sâhib-i arzuhâl Salih Ağa b. Mustafa muvâcehesinde İstanbul kādıları efendiler hazerâtı nezâretlerinde âsûde evkāfdan merhûm Evliyâ Mehmed Efendi Vakfı’nın mütevellîsi es-Seyyid İsmail Efendi ve berber esnâfının Yiğitbaşısı es-Seyyid Mehmed Nuri Ağa hâzır oldukları hâlde vakf-ı mezkûr müstegallâtından İstanbul’da Zeyrek kurbünde Hızır Bey Mahallesi’nde Hâce Kadın Hamamı civârında vâki‘ turşucu ve attâr dükkânları karşısında kasab dükkânı sırasında kâin bir bâb dükkân derûnunda mevcûde başmuhâsebede ve aklâm-ı sâirede mukayyed olmayarak beyne’l-esnâf mu‘teber Mehmed Emin Usta gediği demekle arîf berber ve kahve gedikleri benim yedimde mâlım ve mülküm ve dükkân-ı mezkûr mezbûr Salih Ağa’nın bi’l-icâreteyn tasarrufunda olup mezbûr Salih Ağa beni dükkân-ı merkūmda san‘at-ı mezkûremi i‘mâlden men‘ murâd etmekle suâl olunup dükkân-ı merkūmu bana îcâr edüp san‘at-ı mezkûreyi i‘mâlime mümâna‘at etmemek üzere mezbûr Salih Ağa’ya tenbîh olunmak matlûbumdur deyü takrîr-i meşrûhu üzere eylediği gedik da‘vâsı meşrû‘a olmadığından mâ‘adâ aklâm-ı padişâhîde mukayyed olmadıkları takrîr-i meşrûhundan ve hâmiş-i arzuhâlde muharrer derkenârlardan müstebân olmağla ol vechile kanûnen dahi mu‘teber olmayup da‘vâ-yı mezkûresiyle mezbûr Salih Ağa’ya suâl dahi tevcîh etmediği müdde‘î-i mezbûr Mehmed Emin Ağa’ya tefhîm ve mezbûr Salih Ağa’ya bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 14 Ca sene 1237