İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 265 Hüküm no: 242 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Mustafa ile Yağlıkçı Abdullah Ağa b. Mehmed’in menzil davasında birbirlerinin zimmetlerini ibrâ ettikleri Nısf-ı menzil davâsından fâriğ teberru‘an bi-tarîkı’s-sulh 200 guruş teslîm Ma‘rûz[-ı dâ‘î-i devlet-i aliyyeleridir ki] İstanbul’da simkeşhâne kurbünde Sarrac İshak Mahallesi ahâlîsinden olup bin iki yüz on üç senesi Hacc-ı şerîfe azîmet ve ba‘de edâi’l-hac iki yüz on dört senesi Muharreminde medîne-i Halebü’ş-şehbâ’da fevt olan mevkūfât kalemi hulefâsından Za‘îm el-Hâc Mustafa Efendi b. Ahmed’in sulbiye kızı sâhibe-i arzuhâl Âişe Hatun tarafından ber-vech-i âtî ibrâya vekîl-i müseccel-i şer‘îsi zâtı mu‘arrefe Şerîfe Emine bt. es-Seyyid Ahmed nâm hatun meclis-i şer‘-i münîrde zikri âtî menzile vaz‘-ı yedi mütehakkık olan derûn-ı arzuhâlde mezkûrü’l-ism Yağlıkçı es-Seyyid Abdullah Ağa b. Mehmed nâm kimesne muvâcehesinde nezâret-i dâ‘îlerinde âsûde evkāfdan zikr olunan Sarrac İshak Mahallesi Câmi‘-i şerîfi Vakfı’nın mütevellîsi Mehmed Bedreddin Efendi b. el-Hâc Ahmed Efendi tarafından mürsel vekîli Câbî-i vakf Hâfız Mehmed Derviş Efendi b. el-Hâc Ömer hâzır olduğu hâlde vakf-ı mezbûr müsakkafâtından mahalle-i mezbûrede vâki‘ bir tarafdan vakf-ı mezbûrdan işbu hâzır bi’l-meclis Mehmed Ağa b. Abdullah ile zevcesi gāibetü ani’l-meclis Zeliha bt. Hüseyin tasarruflarında olan müfrez menzil ve bir tarafdan yine vakf-ı mezbûrdan Emine Hatun tasarrufunda olan menzil ve bir tarafdan vakf-ı âhardan Yağlıkçı Ahmed Ağa ve Küttâbdan Süleyman Efendi tasarruflarında olan menziller ve taraf-ı râbi‘i tarîk-i âm ile mahdûd ve müştemilât-ı ma‘lûmeyi hâvî şehriye yirmi akçe icâreli bir bâb menzil ile ittisâlinde olan müfrez menzil ve civârında kâin diğer menzil müteveffâ-i mezbûr el-Hâc Mustafa Efendi’nin hayâtında ile’l-vefât bâ-temessük-ı mütevellî bi’l-icâreteyn müstakillen taht-ı tasarrufunda olup ba‘de vefâtihi sulbiye kızları müvekkilem mezbûre Âişe ile Fâtıma Hatunlara âdiyen intikāl edüp lâkin müvekkilem mezbûre Âişe Hatun ol târihde sagīre bulunmak takrîbiyle tesviye-i umûruna kıbel-i şer‘den vasiyy-i mansûbu olan vâlidesi müteveffât Naile bt. Abdullah nâm Hatun hayâtında bi’l-vesâye menâzil-i mezkûrenin nısf hisse-i şâyi‘alarını bedel-i mislinden noksan olan sekiz yüz guruş bedel-i makbûz mukābelesinde sene-i mezbûre Cemâziyelâhiresinin yirminci günü İstanbul Kādısı esbak merhûm es-Seyyid Mehmed Nureddin Efendi’den aldığı bir kıt‘a izin hücceti mantûkunca Ömer Efendi’ye bâ-re’y-i mütevellî ba‘de’l-ferağ merkūm Ömer Efendi ile merkūme Fâtıma Hatun dahi mecmû‘-ı menâzil-i mezkûreyi sene-i mezbûre Recebinin on dördüncü günü hüsn-i rızâlarıyla mezbûre Nâile Hatun’a bâ-re’y-i mütevellî ba‘de’l-ferağ mezbûre Nâile Hatun dahi iki yüz on sekiz senesi Şevvâli’l-mükerreminin on beşinci günü ancak işbu menzil-i mahdûd-ı mezkûru hüsn-i rızâsıyla işbu mezbûr Abdullah Ağa ve karındaşı es-Seyyid Mustafa Ağa’ya kezâlik bâ-re’y-i mütevellî bi’l-münâsafa ba‘de’l-ferağ merkūm es-Seyyid Mustafa Ağa dahi menzil-i mahdûd-ı mezkûrda olan nısf hisse-i şâyi‘asını hüsn-i rızâsıyla kezâlik bâ-re’y-i mütevellî karındaşı merkūm es-Seyyid Abdullah Ağa’ya fâriğ olmağla ol vechile menzil-i mahdûd-ı mezkûrun mecmû‘u merkūm es-Seyyid Abdullah Ağa’nın el-yevm tasarrufunda olup lâkin müvekkilem mezbûre Âişe Hatun pederi merkūm el-Hâc Mustafa Efendi’nin hîn-i vefâtında sagīre bulunup bedel-i mezkûr dahi müteveffâ-i mezbûrun defter-i kassâmına idhâl olmayup ve müvekkilem mezbûre ba‘de’l-bülûğ ferağ-ı mezkûru dahi mücîze olmamağla menzil-i mahdûd-ı mezkûrun nısf-ı şâyi‘inden bâ-re’y-i mütevellî keff-i yed ve müvekkilem mezbûre içün bana teslîme merkūm es-Seyyid Abdullah Ağa’ya tenbîh olunmak bi’l-vekâle murâdımdır deyü da‘vâya tasaddî etmişdim el-hâletü hâzihî merkūm es-Seyyid Abdullah Ağa müvekkilem mezbûre içün bana mâlından bi-tarîkı’s-sulh teberru‘an iki yüz guruş def‘ ve teslîm ve umûruna sarfla istihlâke emr eylediğinde ben dahi yedinden bi’l-vekâle ahz ü kabz ve emri üzere müvekkilem mezbûrenin umûruna sarfla istihlâk edüp bi’l-vekâle ferağ-ı mezkûru mücîze olmamla bi’l-cümle menzil-i mezkûr husûsuna ve meblağ-ı müstehlek-i merkūmun istirdâdına ve sâir cemî‘ hukūk-ı şer‘iyyeye müte‘allika âmme-i de‘âvî ve mutâlebât ve kâffe-i eymân ve muhâsamâtdan tarafeynden her birimiz müvekkilem mezbûreye izâfetle âharın zimmetini şürût-ı müfside ve uhûd-ı mübtileden ârî ibrâ-i âmm-ı sahîh-i şer‘î ve iskāt-ı tamm-ı sarîh-i mer‘î ile bi’l-asâle ve bi’l-vekâle ibrâ ve iskāt ve her birimiz ber-vech-i muharrer âharın asâleten ve vekâleten ibrâsını kabûl eyledik deyü ikrâr ve tasdîkleri İstanbul Mahkemesi’nden huzûr-ı âlîlerine i‘lâm olundu. Fî 13 Ca sene 1237