İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 282 Hüküm no: 257 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed b. Ali’nin, İdris Beşe b. Hüseyin’e olan borcunu ödemesi gerektiği Ba‘de’l-men‘ 1.020 guruş teslîm Mukābele şüd Ma‘rûz[-ı dâ‘î-i devlet-i aliyyeleridir ki] Sâhib-i arzuhâl es-Seyyid Mehmed b. es-Seyyid Ali Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘-i enverde derûn-ı arzuhâlde mezkûrü’l-ism Bakkāl İdris Beşe b. Hüseyin muvâcehesinde mezbûr İdris Beşe ile bin iki yüz otuz dört senesi hılâlinde İstanbul’da Asmaaltı nâm mahalde bakkāllık ticâretinde şerîkler iken sene-i merkūme Şa‘bâni’l-mu‘azzamının on dördüncü günü mâlımdan mezbûr İdris Beşe’ye altı bin beş yüz guruş ikrâz ve teslîm ol dahi yedimden iktirâz ve kabz ve umûruna sarfla istihlâk edüp ol vechile zimmetinde alacağım olan meblağ-ı merkūm altı bin beş yüz guruş olup sene-i merkūme Zilhiccesinin yirmi yedinci günü târihiyle müverrah bir kıt‘a i‘lâm nâtık olduğu üzere şirket-i merkūmeyi ba‘de’l-fesh ol târihde İstanbul kādısı bulunan fazîletlü Moravîzâde Mehmed Hâmid Efendi tarafından mürsel Kâtib es-Seyyid Salih Afif Efendi’nin İstanbul’da Hasırcılar içinde bakkālân esnâfının pazarbaşısı odasında akd eylediği meclis-i şer‘de esnâf-ı merkūme pazarbaşısı ve yazıcısı ve ustabaşıları hâzır oldukları hâlde şirket-i merkūmenin hesâbını yegān yegān sehv ve galatdan ârî sahîhan rü’yet eylediğimizde lede’l-muhâsebe benim merkūm es-Seyyid Mehmed zimmetinde bin dokuz yüz kırk guruş alacağım zuhûr ettikte ben rızâmla meblağ-ı merkūm bin dokuz yüz kırk guruşdan bâ-tavassut-ı muslihîn merkūm es-Seyyid Mehmed ile kat‘an li’n-nizâ‘ bin guruş üzerine ba‘de’s-sulh ve’l-kabûl bedel-i sulh-ı merkūm bin guruşdan mâ‘adâ ziyâde müdde‘âma ve hesâb-ı merkūmda sehv ve galat vukū‘una ve şirket-i mezbûre zımnında cereyân eden ahz u i‘tâya ve târih-i i‘lâm-ı merkūma gelince sâir cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile sahîhan ibrâ ve iskāt ettikden sonra bedel-i sulh-i merkūm bin guruşun bi’t-taleb bana edâsıyla merkūm es-Seyyid Mehmed [51b] ilzâm olunmağla ben dahi meblağ-ı merkūm bin guruşu merkūm es-Seyyid Mehmed’den hâlâ taleb ederim deyü mazmûnu takrîrine mutâbık bir kıt‘a i‘lâm ibrâzıyla eylediği def‘ ve da‘vâsını ve mazmûn-ı i‘lâm-ı merkūmu mezbûr es-Seyyid Mehmed ikrâr u i‘tirâf etmekle mûcebiyle müdde‘î-i merkūm es-Seyyid Mehmed da‘vâ-yı mezkûresiyle bî-vech mu‘ârazadan ba‘de’l-men‘ meblağ-ı merkūm bin guruşun kemâ-fi’s-sâbık merkūm İdris Beşe’ye edâsıyla ilzâm olunduğu İstanbul Mahkemesi’nden huzûr [-ı âlîlerine i‘lâm olundu.] Fî 21 Z sene 1236