İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 283 Hüküm no: 258 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahya Ağa b. Seyyid Ahmed’in, habbaz fırınını Seyyid İsmail Ağa’ya sattığı Habbâzân Mukābele şüd Ma‘rûz[-ı dâ‘î-i devlet-i aliyyeleridir ki] Âsitâne-i aliyye -lâ zâle mahfûzan fî-vikāyeti’r-Rabbâniye-de kâin uncu esnâfından sâbıkā ekmekçiler kethüdâsı es-Seyyid Yahya Ağa b. es-Seyyid Ahmed nâm kimesne meclis-i şer‘-i enverde sulbî kebîr oğlu es-Seyyid İsmail Ağa nâm kimesne tarafından husûs-ı âtîde tasdîka vekîl-i şer‘îsi hâlâ esnâf-ı mezkûre kethüdâsı el-Hâc Mehmed Ağa b. el-Hâc İbrahim muvâcehesinde mahmiye-i mezbûrede Haseki kurbünde Bostan hamamı ittisâlinde kâin Haseki değirmeni demekle ma‘rûf ma‘lûmü’l-hudûd üç horoslu bir bâb uncu değirmeni derûnunda mevcûde beyne’l-hiref gedik tâ‘bir olunur on iki re’s bârgir ve sâir uncu âlât-ı lâzıme-i ma‘lûmesinden dört re’s bârgir ve onlara isâbet eden sâir âlât-ı lâzıme-i ma‘lûme oğlum müvekkil-i merkūm es-Seyyid İsmail Ağa’nın ve mâ‘adâ sekiz re’s bârgir ve onlara isâbet eden sâir âlât-ı lâzıme-i ma‘lûmesi iştirâken yedimizde mâlımız ve mülkümüz olmağın ben zikr olunan gedik âlât-ı lâzımesinden akd-i âti’z-zikrin sudûruna değin ber-vech-i muharrer yedimde mâlım ve mülküm olan sekiz re’s bârgir ve onlara isâbet eden sâir âlât-ı lâzıme-i ma‘lûmemi kapan-ı dakīk tüccârından ve esnâf-ı mezkûreden Hatîbzâde es-Seyyid el-Hâc Hasan Ağa ve es-Seyyid el-Hâc Veliyüddin Ağa ve Kırımîzâde es-Seyyid el-Hâc Musa Ağa ve es-Seyyid el-Hâc İbrahim Edhem Ağa ve Habbecizâde es-Seyyid İbrahim Ağa ve sâbıkā Ekmekçiler kethüdâsı es-Seyyid Mustafa Ağa ve hâlâ ekmekçiler kethüdâsı Mehmed Efendi ve bi’l-cümle nizâm ustaları hâzır oldukları hâlde tarafeynden bi’l-îcâb ve’l-kabûl şürût-ı müfsideden ârî bâtten ve sahîhan bi-safkatin vâhidetin altı bin guruş semen-i makbûza oğlum müvekkil-i merkūm es-Seyyid İsmail Ağa’ya bey‘ ve temlîk ve teslîm eylediğimde ol dahi yedimden iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ ba‘d zikr olunan gedik âlât-ı lâzımesinde benim kat‘â alâka ve medhalim kalmayup dört re’s bârgir mukaddemâ ve sekiz re’s bârgir hâlâ ber-minvâl-i muharrer şirâen ki cem‘an on iki re’s bârgir ve sâir âlât-ı lâzıme-i ma‘lûme oğlum müvekkil-i merkūm es-Seyyid İsmail Ağa’nın emvâli olmuşdur deyü ba‘de’l-ikrâr ve’t-tasdîk zikr olunan Haseki değirmeni derûnunda mevcûde on iki re’s bârgir ve sâir uncu gediği âlât-ı lâzıme-i ma‘lûmesi kaleminde müvekkil-i merkūm es-Seyyid İsmail Ağa üzerine kayd ile esnâf-ı mezkûrenin nizâmları şürûtu üzere yedine bir kıt‘a sûret i‘tâ buyrulması bâbında istid‘â-yı inâyet eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 16 Ca sene 1237