İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 284 Hüküm no: 259 Orijinal metin no: [51b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Letis v. Andoni’nin tuzlu balık anlaşmazlığında Yuda v. Nadan ve Yozef v. Avram’ın zimmetlerini ibrâ ettiği Tuzlu balık nizâ‘ından birbirleriyle ibrâ Mukābele şüd Ma‘rûz[-ı dâ‘î-i devlet-i aliyyeleridir ki] Derûn-ı takrîrde mastûrü’l-ism Nemçelü Kapudan Françesko Letis v. Andoni nâm müste’men evvelen tercümânı Eklesli ve ba‘dehû tercümânı kapıoğlanı Rafail v. Haçador hâzır olduğu hâlde İstanbul mahkemesinde meclis-i şer‘-i enverde kezâlik derûn-ı takrîrde isimleri mastûr Havâss-ı Refî‘a kazâsına muzâfe kasaba-i Hasköy mütemekkinlerinden Yuda v. Nadan ve şerîki Edirneli Yozef v. Avram nâm Yahûdiler muvâcehelerinde sene-i İseviyenin işbu bin sekiz yüz yirmi ikinci senesi Kânun-ı sânisi hılâlinde beher keyli ellişer guruşa olmak üzere mesfûrân Yuda ve Yozef Yahûdilere bey‘ ve teslîm onlar dahi iştirâken iştirâ ve kabz ve âhara bey‘le istihlâk eyledikleri elli sekiz bin beş yüz aded portakal semenlerinden zimmetlerinde alacak hakkım olan iki bin dokuz yüz yirmi beş guruşun dört yüz on dört guruşunu mesfûrânın mâllarından ve yedlerinden iştirâ ve kabz eylediğim on dört fıçı memlû tuzlu hamsi balığı semeninden zimmetime ta‘alluk eden dört yüz on dört guruşa takās ve mahsûb eylediklerinde ben dahi mukāssa ve kabûl etmemle ba‘de’t-tenzîl zikr olunan portakal semenlerinden mersûmân zimmetlerinde bâkī iki bin beş yüz on bir guruş alacak hakkım kalmağla mesfûrândan taleb eylediğimde onlar dahi ba‘de’l-ikrâr yine müşterek mâllarından otuz dört fıçı memlû diğer tuzlu hamsi balığını fıçılarını bin beş yüz altı guruşa bana bey‘ ve teslîm ben dahi yedlerinden iştirâ ve kabz etmemle semen-i mezkûr bin beş yüz altı guruşu dahi meblağ-ı bâkī-i merkūm iki bin beş yüz on bir guruşun bin beş yüz altı guruşuna her birimiz bi’t-terâzî ba‘de’t-takās ve’l-mukāssa ve’l-kabûl meblağ-ı bâkī-i mezkûr iki bin beş yüz on bir guruşdan dahi zimmetlerinde bâkī kalan bin beş yüz guruşu mersûmân Yuda ve Yozef Yahûdilerden taleb ederim deyü tasaddî eylediğim da‘vâmdan bâ-vesâtet-i muslihîn bi’t-tav‘ ve’r-rızâ mesfûrân Yuda ve Yozef Yahûdiler ile beş yüz guruş bedel-i makbûz üzerine her birimiz ba‘de akdi’l-musâlaha ve’l-kabûl ziyâde müdde‘âm olan beş yüz beş guruş ve bi’l-cümle husûs-ı mezkûra ve her birimiz âhar ile kat‘â da‘vâ ve nizâ‘ımız kalmamak ma‘nâsına sâir cemî‘ hukūk-ı şer‘iyyeye müte‘allika âmme-i de‘âvî ve mutâlebâtdan ve kâffe-i eymân ve muhâsamâtdan ibrâ-i âmm-ı kātı‘u’n-nizâ‘ ve râfi‘u’l-hısâm ile her birimiz âharın zimmetini kabûlü hâvî ibrâ ve iskāt [52a] ve bu vechile külliyen kat‘-ı nizâ‘ eyledik deyü ikrâr ve tasdîkleri tescîl ve mahkeme-i merkūmeden huzûr [-ı âlîlerine i‘lâm olundu.] Fî 19 C sene 1237